ԵՐԵՎԱՆ, 4 մայիսի — Sputnik. ՀՀ որևէ քաղաքացի այսօր որևէ օրինական գործունեությամբ սահմանափակված չէ։ Այսօր Արարատի մարզում ներդրումային բիզնես համաժողովի ժամանակ այս մասին ասաց ՀՀ վարչապետ Նիկոլ Փաշինյանը` խոսելով իշխանափոխությունից հետո կատարված փոփոխությունների մասին։
Ըստ նրա` հեղափոխությունից առաջ հարցին, թե ի՞նչ կարող էր անել ՀՀ քաղաքացին տնտեսական, ներդրումային քաղաքականության առումով, պատասխանը մեկն էր` ոչինչ։
«ՀՀ քաղաքացին կա՛մ ոչինչ անել չէր կարող, կա՛մ էլ շատ սահմանափակ կարող է ինչ–որ բան անել, այն էլ` որոշակի թույլտվությամբ։ Իսկ այդ համակարգում ինչ–որ բան անել կարող էին էլիտայի ներկայացուցիչները` համարյա կիսաստվածներ, որոնք կարող էին որոշել մարդկային ճակատագրեր։ Ի՞նչ է փոխվել հեղափոխությունից հետո։ Փոխվել է այն, որ ՀՀ քաղաքացին հիմա կարող է անել ամեն ինչ, նրա ոչ մի հնարավորություն սահմանափակված չէ»,–ասաց վարչապետը` հավելելով, որ փոխվել է ամենակարևորը` ՀՀ–ն այլևս երբեք չի լինի հուսահատ։
Մյուս կողմից, ըստ նրա, մարդիկ երբեմն չեն ուզում հավատալ իրենց տեսածին, լսածին ու շարունակում են ունենալ «դաբռոների» կարիք։
«Նախկինից եկած շատ իներցիոն գործընթացներ մեզ խանգարում են։ Տնտեսական ներդրում ունենալու ցանկություն հայտնողներն ուզում են անձամբ հանդիպել երկրի ղեկավարի հետ։ Մենք, իհարկե, պատրաստ ենք, սակայն, ցավոք, օրն ունի 24 ժամ, շաբաթը 7 օր, ամիսը` երբեմն 27, 28, բայց մաքսիմում 31 օր»,–ասաց Փաշինյանը։
Նա հայտնեց նաև, որ մայիսի 8–ին ասուլիսով է հանդես գալու ու կետ առ կետ ներկայացնելու այն բոլոր փոփոխությունները, որ մեկ տարվա ընթացքում տեղի են ունեցել ՀՀ–ում։