Ամբերդի տարածքում շինարարության թույլտվություն տվողն ազատվել է աշխատանքից

ԵՐԵՎԱՆ, 4 մայիսի — Sputnik. Արագածոտնի մարզային ծառայության պետ Մանուկ Մանուկյանը, որի որդին Ամբերդի` 1986–ին հաստատված և 2013-ին պահպանական գոտուց հանված տարածքում շինարարություն իրականացնողն էր, ազատվել է աշխատանքից: Այս մասին Facebook սոցիալական ցանցի իր էջում գրել է ՀՀ մշակույթի փոխնախարար Տիգրան Գալստյանը։

«Պատմամշակութային արգելոց-թանգարանների պատմական միջավայրի պահպանության ծառայություն ՊՈԱԿ-ի տնօրենից տեղեկացա Մանուկյանի ազատման մասին»,– գրել է Գալստյանը։

Հիշեցնենք, որ օրերս «Ամբերդ ամրոց» պատմամշակութային արգելոցում շինաշխատանքներ էին սկսվել։ Մշակույթի նախարարությունը զբաղվել էր խնդրով, իսկ ՀՀ քաղաքաշինության կոմիտեի նախագահ Վահագն Վերմիշյանի հանձնարարությամբ «Ամբերդ ամրոց» պատմամշակութային արգելոցի պահպանման գոտում շինարարություն իրականացնող սեփականատիրոջն ուղարկվել էր ծանուցում, և շինարարական աշխատանքները դադարեցվել էին:

Ամբերդ ամրոցի ոդիսականը. ի՞նչ է տեղի ունենում և ինչո՞ւ է կանգ առել շինարարությունը

Փոխնախարար Գալստյանն էլ օրերս լրագրողների հետ զրույցում նշել էր, որ 2013–ին Ամբերդի պահպանվող տարածքի չափսերում փոփոխություններ են եղել։ Պահպանվող տարածքի փոփոխության համար թույլտվություն տվողներից մեկն էլ մշակույթի նախարարության «Պատմամշակութային արգելոց-թանգարանների և պատմական միջավայրի պահպանության ծառայության» ՊՈԱԿ-ի Արագածոտնի մարզային պետն է եղել` Մանուկ Մանուկյանը։