ԵՐԵՒԱՆ, 3 մայիսի — Sputnik. Ճափոնի մէջ նոր 10000-անոց եէն կը թողարկեն յայտնի գործարար եւ բարերար Էյիչի Շիպուսաւայի պատկերով: Այս մասին կը յայտնեն ճափոնական լրատուամիջոցները:
1922 թուականին Ճափոնի մէջ Շիպուսաւան մարդասիրական օգնութիւն կազմակերպած էր Օսմանեան կայսրութեան մէջ Ցեղասպանութենէն փրկուած հայերուն համար:
1921 թուականին ճափոնցի գործարար եւ բարերարը հիմնադրամ մը ստեղծած էր հայ փախստականներուն աջակցելու համար:
Շիպուսաւան իր հետքը ձգած է Ճափոնի նորագոյն պատմութեան մէջ: Անոր երբեմն ճափոնական դրամատիրութեան հայր կ’անուանեն: Շիպուսաւան յայտնի եղած է որպէս յաջողակ դրամավար եւ գործարար, բազմաթիւ բաժնետիրական ընկերութիւններու հիմնադիր, որոնց շարքին են «Թոքիօ գազը», «Իսիկաւաձիմա Խարիման» եւ ճափոնական տնտեսութեան այլ ներկայիս հսկաներ:
Իր կեանքին ընթացքին ան հիմնած եւ կառավարած է մօտ 5 հազար ձեռնարկութիւն, միեւնոյն ժամանակ ընկերային ուղղուածութիւն ունեցող նախաձեռնութիւնները, որոնց հետ առնչութիւն ունեցած է Շիպուսաւան, 600–ի շուրջ եղած են: