ԵՐԵՎԱՆ, 3 մայիսի — Sputnik. ՀՀ կառավարությունը հնարավոր աջակցություն կցուցաբերի Ալավերդու պղնձաձուլարանին։ Այսօր կառավարությունում հրավիրված ասուլիսի ժամանակ այս մասին ասաց ՀՀ տնտեսական զարգացման և ներդրումների նախարար Տիգրան Խաչատրյանը։
Նա հիշեցրեց, որ հիմա գործարանի արտադրության վերականգնման տարբերակներ են դիտարկվում։
Նշենք, որ գործարանը մոտ 650 աշխատակից ունի, որոնք շարունակում են աշխատավարձ ստանալ պարապուրդի ընթացքում։
Այստեղ նախկինի պես քննարկում են ժամանակակից պղնձաձուլարան բացելու հնարավորությունը։ Ուզում են ոչ թե անմշակ, այլ մաքուր պղինձ արտադրել, որը պատրաստ կլինի օգտագործման համար։ Իսկ ծծմբային գազերի արտանետումները նվազագույնի կհասնեն (ծծումբը ևս կօգտագործվի արտադրության մեջ, ենթադրաբար` գիպսի)։
Բայց որպեսզի գործարանը միջոցներ կուտակի տեխնիկական վերազինման համար, պետք է գոնե ինչ–որ հասույթ ունենա։ Այդ պատճառով էլ այսօր դիտարկվում է գործարանը «ոնց կա» ժամանակավոր վերագործարկելու հնարավորությունը` անմշակ պղինձի թողարկմամբ։
Բնապահպանական պետական տեսչությունը դեմ էր դրան։ Պահանջում էր գործարանի արտանետումները կրճատել 90%–ով, ինչն այսօրվա տեխնոլոգիայի դեպքում անհնար է։
Գործարանից պահանջում են 380 մլն դրամի տուգանք վճարել նախկին ավելորդ արտանետումների համար։ Սակայն գործարանում հայտարարում են, որ իրենց շրջանառությունից չեն կարող միանգամից այդքան գումար հանել։ Առանց այդ էլ գործարանում մոտ 500 հազար դոլար են ծախսել աշխատակիցներին աշխատավարձ վճարելու համար։ Թեև գործարանը կանգնած է, նրանց չեն ազատում աշխատանքից և շուրջ կես տարի պարապուրդի մեջ են պահում։
Կարո՞ղ է արդյոք կառավարությունը չեղարկել տուգանքները և նորերը չգրել , համենայն դեպս առայժմ)։ Այս հարցին նախարարը պատասխանեց. «Նման խնդիր դրված չէ. գործարանը նման բան չի էլ խնդրում։ Եթե նրանք անօրինական են համարում տուգանքները, կարող են բողոքարկել դատական կարգով։ Իսկ դատարանը կպարզի, թե որ որոշումն է արդար»։
Դեռ չի լուծվել նաև արդյունաբերական մյուս հսկայի` «Նաիրիտի» հարցը։
Այստեղ սնանկացման գծով կառավարիչ կա, որը գործարանի գույքը վաճառում է պարտքերի դիմաց։ Գործարանը պարտք է «Գազպրոմ Արմենիային», «Էլցանցերին», Երևանյան ՋԷԿ–ին, ինչպես նաև պետբյուջեին։ Գործարանին հետևում է էներգետիկայի նախարարությունը, որի ներկայացուցիչները մասնակցում են գործարանի սնանկության խորհրդի նիստերին։ Նրանց խնդիրը ոչ միայն պարտքերը պետությանը վերադարձնելն է, այլև հայրենական արտադրությունը (թող որ պարապուրդի մատնված) պահպանելը։
«Ընդհանուր առմամբ կառավարությունը հետևում է, որ արտադրության հետ առնչություն չունեցող գործարանի ակտիվները վաճառվեն։ Իսկ բուն արտադրական հզորություններին ձեռք չեն տալիս։ Որոշակի ժամանակ առաջ գործարանի նախկին աշխատակիցները հայտարարեցին նման փորձի մասին, բայց հետո պարզվեց, որ նման բան չի եղել», – ասաց նախարարը։
Ինչ վերաբերում է ներդրողներին, ապա Ալավերդու գործարանի սեփականատեր «Վալլեքս» ընկերությունը բանակցություններ է վարում Չինաստանի ներդրողների հետ։ «Նաիրիտում» անմիջապես ներդրում կատարելու պատրաստակամ ներդրողներ դեռ չկան։