ԵՐԵՎԱՆ, 30 ապրիլի — Sputnik. Հանրապետությունում ոսկերչական իրերի շուկաներում հարկերը պետք է փոխել։ Այդ մասին խորհրդարանում հայտարարեց Հայաստանի ֆինանսների փոխնախարար Արման Պողոսյանը՝ Հարկային օրենսգրքում բարեփոխումները քննարկելու ժամանակ։ Քննարկումները տեղի են ունեցել խորհրդարանի տնտեսական հանձնաժողովի նախաձեռնությամբ։
Ոսկերչական զարդեր վաճառողները մինչև հիմա տուրք են վճարում իրենց վաճառասեղանի չափսից։ Դա հարիր չէ ոչ միայն զարգացած, այլ նույնիսկ զարգացող երկրին, նշեց փոխնախարարը։
«Հարկը պետք է կախված լինի շրջանառությունից։ Որքան ոսկի եք վաճառել, այդքան էլ հարկ պետք է տաք։ Մենք նման մոտեցում կառաջարկենք», – հայտարարեց Պողոսյանը։
Միաժամանակ, շատ ոսկերիչներ աշխատում են ոչ թե ոսկու ձուլակտորների հետ, այլ հին զարդերի, որոնք գնում են։ Գործող օրենքի համաձայն, դրանցից պետք է վճարեն 11 տոկոս հարկ։ Նման հարկ է վճարվում միակողմանի գործարքների դեպքում, երբ ապրանքի մատակարարը չի կարող ապրանքագիր ներկայացնել։
Ի տարբերություն ԱԱՀ–ի, այդ հարկը չի կարելի չեղարկել, և դրա ամբողջ բեռը կմնա ոսկերիչների վրա։ Ուստի, ինչպես նշեց Պողոսյանը, ֆինանսների նախարարությունը պատրաստ է այդ հարկից ազատել երկրորդական ոսկու գնումը։
Նշենք, որ Հարկային օրենսգրքում այդ և այլ փոփոխությունները կառավարությունն առաջարկում է ուժի մեջ մտցնել 2020թ–ից։ Գաղափարներից մեկն ամբողջ բիզնեսը հասույթից, այլ ոչ թե ֆիքսված վճարումներից հարկելն է։