ԵՐԵՎԱՆ, 29 ապրիլի — Sputnik. Երևանի քաղաքապետարանն այսօր սկսել է քանդել Նոր–Դոս փողոցում գտնվող կրպակները։
Այդ փողոցում հիմնականում շինանյութ և սգո պարագաներ են վաճառում։
Մոտ կես ժամ առաջ կենտրոնի վարչակազմը բուլդոզեր է ուղարկել փողոցի հատվածներից մեկը։ Մի քանի թիթեղյա կրպակ կքանդեն։
Sputnik Արմենիայի թղթակցի հետ զրույցում կենտրոն վարչական շրջանի աշխատակիցները հիշեցրին, որ կրպակները ժամանակավոր շինություն են համարվում։ Այդ պատճառով էլ դրանց շահագործման համար ժամանակավոր թույլտվություն է տրվում։
Այդ կրպակների աշխատանքային թույլտվությունն ավարտվել է ավելի քան 10 տարի առաջ, սակայն նրանք շարունակում էին աշխատել։ Այժմ քաղաքապետարանն իրավունք ունի չերկարաձգելու այն։ Թե ինչու կրպակները չէին քանդում մինչ այդ, այլ հարց է։ Գուցե զիջումների էին գնում, և չի բացառվում, որ դա անշահախնդիր չի արվել։ Այս հանգամանքը, սակայն, չի հանդարտեցրել կրպակների մտահոգ սեփականատերերին։
«Ի՞նչ անենք, որ ժամանակավոր են, իսկ ինչպե՞ս ապրենք։ Այստեղ եմ աշխատում, երկու երեխա ունեմ, բանկում վարկս չեմ մարել։ Ի՞նչ են նրանք այս կրպակի փոխարեն ինձ առաջարկում», – ասում է առևտրականներից մեկը, որի անունը Արմեն է։
Ինչպես է քաղաքապետարանն ապամոնտաժում Օղակաձև զբոսայգու սրճարանը. տեսանյութ
Մեր հարցին՝ ինչու են հարևան ավելի խոշոր շինությունները, օրինակ` խոշոր բուքմեյքերական գրասենյակը, մայթերին կանգնած շարունակում գործել, թաղապետարանի աշխատակիցները նշեցին, որ այդ շենքերը նույնպես կարելի է քանդել, բայց փոխհատուցում տրամադրելուց հետո։
Կրպակների սեփականատերերին փոխհատուցում չի հասնում, քանի որ շինությունները ժամանակավոր են և ֆունդամենտ չունեն։
Շրջիկ սրճարանատերերը ժամանակ են խնդրում. ՀԷՑ–ը պնդում է` հոսանքազրկումն օրինական է