ԵՐԵՎԱՆ, 28 ապրիլի – Sputnik. Ռուս պրոդյուսեր, սցենարիստ, կատակերգակ դերասան և երաժիշտ Սեմյոն Սլեպակովը «Comedy Club»–ի վերջին եթերի ընթացքում պատմել է զավեշտալի պատմություն այն մասին, թե ինչպես է ծանոթացել հայտնի հումորիստ, շոումեն Գարիկ Մարտիրոսյանի հետ: Վերջինս, ի դեպ, ներկա էր որպես հանդիսատես: Սլեպակովի խոսքով, ինչպես յուրաքանչյուր նորմալ հայի դեպքում, այդ ծանոթության հիմքը կոմերցիոն էր:
«Երբ մենք ՈՒՀԱ-ից էինք, մեր թիմը եկավ նրա մոտ, որպեսզի Գարիկն օգներ մեզ, իհարկե, գումարի դիմաց: Նա բնակարան էր գնել, երևի պարտքով, որովհետև նրան միշտ փող էր պետք. դարձել էր մոսկվայաբնակ: Ուներ կապույտ կոշիկներ, իսկ մենք մինչ այդ երբեք չէինք տեսել կապույտ կոշիկներ: Սեղմեցինք Գարիկի բնակարանի դոմոֆոնի կոճակը, լսվեց նրա կնոջ՝ Ժաննայի ձայնը` ո՞վ է: Մենք ասացինք. «ՈՒՀԱ Պյատիգորսկի թիմն է, մենք եկել ենք Գարիկի մոտ, որպեսզի նա օգնի մեզ գտնել ՈՒՀԱ-ական լավ համար»: Ժաննան խիստ տոնով ասաց` սպասեք: Մենք սպասեցինք երկու-երեք րոպե, հետո դոմոֆոնով լսեցինք Գարիկի ձայնը. «Ուրեմն այսպես, տղաներ, գրեք»,- պատմեց Սլեպակովը:
Դրանից հետո Սլեպակովը հայտարարեց, որ ևս մեկ ծիծաղելի դեպք կպատմի, ի պատասխան, Գարիկ Մարտիրոսյանը խնդրեց ցույց տալ, թե ինչպես է իրեն նմանակում: Այդ ժամանակ Սլեպակովն ուրախացրեց Մարտիրոսյանին.
«Գարիկն ասում է. «Սենկա, արի իմ տուն, ես քեզ ցույց կտամ, թե ինչպես եմ վերանորոգել բնակարանս»: Գնում եմ, Մարտիրոսյանը դիմավորում է, սովորական բակ, սովորական տուն: Նա ինձ ասում է. «Սենկա՛, կարճ ասած, նայիր, ես քեզ միանգամից ուզում եմ նախազգուշացնել, որ սա շատ լուրջ շենք է, այստեղ Մոսկվայի շատ լուրջ մարդիկ են ապրում՝ պրոֆեսորներ, դերասաններ, ակադեմիկոսներ, գիտնականներ: Ես քեզ շատ եմ խնդրում՝ ինձ խայտառակ չանես, ոչ մի բան չնետես, բարձր չխոսես»: Եվ ես վախեցած քայլում եմ, շատ զգույշ, որ հանկարծ ոչ մեկին չանհանգստացնեմ: Ժաննան ցույց է տալիս, թե ինչ հիանալի վերանորոգում են արել: Հետո գալիս է Խարլամովը, Գարիկն իրեն էլ նույն բանն է ասում: Հետո մենք դուրս ենք գալիս և տեսնում ենք, որ մի անտուն է նստած՝ դեմքով դեպի մեզ…»,- պատմեց Սլեպակովը:
Քանի որ այս պատմության վերջաբանն այնքան էլ ցենզուրայի սահմաններում չէ, դիտեք տեսանյութն իմանալու համար, թե ինչով է ավարտվել Սլեպակովի այցը Գարիկի տուն (5-րդ րոպեից):
Գարիկ Մարտիրոսյանը ևս հետ չմնաց և պատմեց ծիծաղելի պատմություն Սլեպակովի մասին, թե ինչպես էր նա ինչ-որ տեղ մեկնում, նույն չվերթի մեջ մի տղամարդ էր, որի բաճկոնը, գոտին, ժամացույցը, ճամպրուկը և ձեռքի պայուսակը կոկորդիլոսի կաշվից էին, անունն էլ Գենա էր:
Գիտեի` Մարտիրոսյանի հետ եմ ապրում, պարզվեց` Նոստրադամուսն է. Գարիկի ու կնոջ գրառումները
«Երբ Սենյան ինձ դա պատմեց, ես նրան ասացի՝ «Դու բաց թողեցիր այս պատմության ամենածիծաղելի հատվածը. այստեղ ծիծաղելին այն չէ, որ Գենա անունով տղամարդը կոկորդիլոսի կաշվից հագուստով և իրերով էր, այլ այն, որ առաջին անգամ Կոկորդիլոս Գենան և Չեբուրաշկան թռչում էին նույն չվերթով՝ բիզնես կարգով, -պատմեց Գարիկը՝ ծիծաղեցնելով բոլոր ներկաներին: