ԵՐԵՎԱՆ, 25 ապրիլի — Sputnik. Հայաստանի վարչապետ Նիկոլ Փաշինյանը Թուրքիայի նախագահ Ռեջեփ Թայիփ Էրդողանի ապրիլի 24-ի ելույթն անվանել է ծայրահեղ ատելության խոսք։ Այս մասին նա գրել է Twitter սոցիալական ցանցի իր միկրոբլոգում։
«Օսմանյան կայսրության հայ բնակչությանը, որը դատապարտվեց զանգվածային սպանդի ու մահվան երթերի, «հայ հրոսակներ ու նրանց աջակիցներ» անվանելը, 1.5 միլիոն մարդ սպանելն ու դա «ամենատրամաբանական վարքագիծ» որակելը ոչ միայն ժխտողականության նոր մակարդակ է, այլև՝ մի ողջ ազգի սպանդի արդարացում»,–գրել է Փաշինյանը:
Նրա խոսքով` ապրիլի 24-ին Էրդողանի արած հայտարարությունը հայ ժողովրդի և ողջ մարդկության հանդեպ խորին վիրավորանք է և ծայրահեղ ատելության խոսք: «Աշխարհը պետք է չլռի»,–գրել է ՀՀ վարչապետը։
Հիշեցնենք, որ երեկ Էրդողանը ՀԱԵ Կոստանդնուպոլիսի պատրիարքի փոխանորդ, արքեպիսկոպոս Արամ Աթեշյանին ուղղված նամակում ցավակցություն է հայտնել 1915թ.–ին Օսմանյան կայսրությունում մահացած հայերի սերունդներին։
«Հարգում եմ օսմանյան հայերի հիշատակը, որոնք մահացել են Առաջին աշխարհամարտի դաժան պայմաններում, իմ ցավակցությունն եմ հայտնում նրանց սերունդներին։ Ես Ալլահի ողորմածություն եմ մաղթում մարդկանց, որոնք այդ ժամանակ մահացել են համաճարակների, գաղթի, թուլացած պետական իշխանության պատճառով, որի հետևանքով ավազակախմբերը և զինված խմբավորումներն անկարգություններ են կազմակերպել», – գրել էր Էրդողանը։
Նա հավաստիացրել է, որ թուրքական իշխանությունները «հատուկ նշանակություն են տալիս հայ համայնքի անվտանգությանն ու բարեկեցությանը»։