ԵՐԵՎԱՆ, 24 ապրիլի — Sputnik. Հայտնի «Վիքիպեդիա» առցանց հանրագիտարանն իր իրանալեզու տարբերակի գլխավոր էջում տեղադրել է 1915թ.–ի Հայոց ցեղասպանության ժամանակների լուսանկար, որը վերջերս Թեհրանում Ադրբեջանի դեսպանատունը փորձել է ներկայացնել որպես կադր 1992թ–ի Խոջալուի դեպքերից։ Այդ մասին Facebook–ի իր էջում գրել է արևելագետ, Իրանի հարցերով մասնագետ Արմեն Իսրայելյանը` նշելով, որ դա արվել է հենց ապրիլի 24–ին` Հայոց ցեղասպանության զոհերի հիշատակի օրը։
«Ի դեպ, հենց այդ լուսանկարն է Իրանում Ադրբեջանի դեսպանատունը ներկայացրել այս տարի Խոջալուի դեպքերին նվիրված ցուցահանդեսում` վերագրելով այն հենց այդ զարգացումներին», – գրել է փորձագետը։
Հիշեցնենք, որ այս տարվա մարտի սկզբին Իրանում Ադրբեջանի դեսպանատունը փորձել է Հայոց ցեղասպանության օրերին արված` զավակի մահը սգացող հայ կնոջ նկարը ներկայացնել որպես Խոջալուի դեպքերի ժամանակ արված լուսանկար։
Հայոց ցեղասպանության չընդունումը ծնեց նոր ցեղասպանություններ. ո՞ր ազգերը «ճաշակեցին» այն
Իրանական լրատվամիջոցը բացահայտել է Ադրբեջանի կողմից պետական մակարդակով իրականացվող կեղծ քարոզչությունը՝ խայտառակ իրավիճակի մեջ դնելով Իրանում Ադրբեջանի դեսպան Բունիադ Հուսեյնովին: Ինչպես հաղորդում է իրանական azariha.org կայքը, Ադրբեջանի դեսպանատան կողմից Խոջալուի դեպքերի մասին Թեհրանում կազմակերպված լուսանկարչական ցուցահանդեսում նեկայացվել է Հայոց ցեղասպանության մասին վկայող հայտնի լուսանկարը, որտեղ Հալեպի մերձակայքում, սիրիական անապատում գաղթի ճամփա անցնող հայ կինը սգում է իր երեխայի կորուստը:
«Տարօրինակ դեպք է տեղի ունեցել Թեհրանում կազմակերպված լուսանկարչական ցուցահանդեսում, որը կազմակերպվել էր Բաքվի դեսպանատան կողմից: Տարօրինակն այն է, որ պատկերասրահում ցուցադրված մի քանի նկարներ գողացված են։ Դրանք, փաստորեն, պատկանում են Օսմանյան կայսրության կողմից իրականացված Հայոց ցեղասպանության ժամանակաշրջանին, որոնք Բաքվի կառավարությունը ներկայացրել է որպես Խոջալուի զոհեր»,- գրել է իրանական կայքը:
Կեղծիքի հեղինակները հաշվի չեն առել անգամ, որ Խոջալուի իրադարձությունները տեղի են ունեցել ձմռանը, երբ գետինը ձնապատ էր։