ԵՐԵՎԱՆ, 24 ապրիլի – Sputnik. Ապրիլի 24-ը շատ կարևոր օր է հայերի և ամբողջ մարդկության համար։ Այսօր ռուսական Առաջին ալիքի «60 րոպե» թոք–շոուի ուղիղ եթերում այս մասին ասաց ՀՀ վարչապետ Նիկոլ Փաշինյանը։
«Դուք գիտեք, որ այսօր ցեղասպանության զոհերի հիշատակի օրն է, որն իրագործվել է Օսմանյան կայսրությունում 1915-22 թվականներին։ Մեզ` հայերիս համար սա շատ կարևոր է օր է։ Կարծում եմ, որ կարևոր է օր է նաև ամբողջ մարդկության համար։ Մեզ համար շատ կարևոր է ցեղասպանության միջազգային ճանաչման հարցը` ապագայում ցեղասպանությունները կանխելու համար»,– ասաց նա։
Փաշինյանը հիշեցրեց, որ Ռուսաստանի Դաշնության պետդուման դեռ 1995 թվականին է պաշտոնապես ճանաչել Հայոց ցեղասպանությունը։
«Եվ մենք, իհարկե, շատ բարձր ենք գնահատում այդ դիրքորոշումը»,– ասաց Փաշինյանը։
1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։
Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին է ընդունում այդ հարցի վերաբերյալ քննադատությունները։