ԵՐԵՎԱՆ, 24 ապրիլի — Sputnik. ՀՀ արվեստի վաստակավոր գործիչ, Հայաստանի ժողովրդական արտիստ Տիգրան Մանսուրյանը Հայոց ցեղասպանության ժամանակ ողջ մնացածների ժառանգ է։ Այսօր նա այդ մասին պատմեց լրագրողների Ծիծեռնակաբերդի հուշահամալիր կատարած այցելության ընթացքում։
«Մայրս որբանոցի սան էր։ Մի քանի ամսականում հայտնվել է որբանոցում` ճանապարհին կորցնելով քրոջը։ Իսկ հորը Մարաշում մարագի մեջ այրել են թուրքերը` այլ տղամարդկանց հետ։ Մայրը հասել է Հալեպ, Հալեպում է մահացել»,– պատմեց Մանսուրյանը` հավելելով, որ հոր ընտանիքը ևս ցեղասպանության զոհերի հետնորդներ են։
Մանսուրյանը հիշեց նաև, որ մայրը ցեղասպանության հուշահամալիր էր այցելում ոչ միայն ապրիլի 24-ին, այլև տարվա այլ օրերին ևս։
«Հաճախ թոռների ձեռքը բռնած, մի փունջ վարդ ձեռքին գալիս էր այստեղ` ծաղիկ դնելու։ Իր համար սա իր ծնողների գերեզմանն էր։ Ես շարունակում եմ նույնը»,– ասաց նա։
Տիգրան Մանսուրյանը ծնվել է Բեյրութում: 1940-ականների վերջերին ընտանիքով ներգաղթել է Հայաստան:
Իր երաժշտության պես մաքուր ու զուլալ. Մանսուրյանական բանաձև