ԵՐԵՎԱՆ, 22 ապրիլի — Sputnik. Շրի Լանկայում տեղի ունեցած պայթյուններից հետո բնակչության շրջանում խուճապ չկա։ Sputnik Արմենիայի թղթակցի հետ զրույցում այս մասին ասաց Շրի Լանկայի բնակչուհի Իզաբելլա Վարդանյանը։
«Տեղի բնակիչները կարծում են, որ ահաբեկչությունների կազմակերպիչը նոր ահաբեկչական խմբավորում է, որն այլ արգելված կազմակերպությունների աջակցությունն է ստանում», – ասաց Վարդանյանը։
Նրա խոսքով` տեղի բնակչության շրջանում միջկրոնական հակամարտություն չկա, ավելին` քաղաքացիները տեղի մուսուլմաններին չեն մեղադրում տեղի ունեցածի համար, քանի որ համարում են, որ նրանք ահաբեկչությունների հետ առնչություն չունեն։ Վարդանյանը նաև հայտնեց, որ պարեկային ժամն արդեն չեղարկել են, և իրավիճակն աստիճանաբար կարգավորվում է։
Ըստ Վարդանյանի` Շրի Լանկայում հայերի թիվն այդքան էլ մեծ չէ։ Անձամբ նա երկու հայրենակցի է ճանաչում. մեկն ամուսնացած է տեղի բնակչի հետ, մյուսն աշխատանքի բերումով է գտնվում երկրում։ Ընդհանուր առմամբ հայ համայնք այնտեղ չկա։
Հիշեցնենք, որ ապրիլի 21-ին` Զատկի օրը, Շրի Լանկայի տարբեր հյուրանոցներում ու եկեղեցիներում 8 պայթյուն է որոտացել։ Եվս մեկ պայթյուն էլ գրանցվել է ապրիլի 22-ին Կոլոմբոյում (Շրի Լանկա) Սուրբ Անտոնիո եկեղեցու մոտ։ Ծայրահեղական խմբավորումներից ոչ մեկը տեղի ունեցածի համար պատասխանատվություն դեռ չի ստանձնել, սակայն արդեն հայտնի է, որ դա ծրագրված ահաբեկչություն էր։ Կառավարությունը կեսգիշերից արտակարգ դրություն է մտցրել երկրում։
Պայթյունների հետևանքով զոհվել է մոտ 300 մարդ։ Եվս 500 մարդ տուժել է։ Միջադեպի հետ կապված 24 անձ է կալանավորվել։ ՀՀ ԱԳՆ տվյալներով` զոհերի թվում հայեր և ՀՀ քաղաքացիներ չկան։
Երեկ ՀՀ վարչապետ Նիկոլ Փաշինյանը և ՀՀ նախագահ Արմեն Սարգսյանը ցավակցական հեռագրեր են հղել Շրի Լանկայի ժողովրդավարական սոցիալիստական Հանրապետության նախագահ Մաիտրիպալա Սիրիսենային: Ավելի վաղ դատապարտող հայտարարությամբ հանդես էր եկել նաև ՀՀ ԱԳՆ–ն։