ԵՐԵՎԱՆ, 22 ապրիլի- Sputnik. «Նոր ալիք» երգի միջազգային մրցույթում Հայաստանն այս տարի կներկայացնի երիտասարդ երգիչ Արտյոմ Հակոբյանը: Երգիչն այս մասին հայտնել է Facebook-ի իր էջում տեսաուղերձի միջոցով: Նա երաժշտասերների լայն շրջանակին հայտի է «Իքս ֆակտոր 4» նախագծից՝ Ծյոմ երաժշտական կեղծանվամբ:
Նշենք այս տարի «Նոր ալիք» երգի միջազգային մրցույթը կանցկացվի օգոստոս ամսին Ռուսաստանի Սոչի քաղաքում:
«Ողջունում եմ բոլոր հայրենակիցներիս: Արդեն երեք օր է՝ գտնվում եմ Մոսկվայում: Երկու բավականին ծանր օր եմ անցկացրել, քանի որ մասնակցում էի «Նոր ալիք» երգի միջազգային մրցույթի կիսաեզրափակիչին: Այս տարի մրցույթում Հայաստանը ներկայացնելու եմ ես»,-տեսաուղերձում ասել է երգիչը:
2002 թվականից անցկացվող մրցույթի ստեղծման գաղափարը երաժիշտներ Իգոր Կրուտոյինն ու Ռայմոնդ Պաուլսինն է: Մրցույթը նպատակ ունի բացահայտել ոչ միայն Ռուսաստանի, այլև այլ երկրների տաղանդավոր երգիչներին: