ԵՐԵՎԱՆ, 21 ապրիլի — Sputnik. Ժամեր առաջ դանակահարված վիճակում Սուրբ Գրիգոր Լուսավորիչ բժշկական կենտրոն են տեղափոխվել երկու տղամարդ:
Ավելի ուշ պարզվել է, որ նրանք հայր և որդի են և ապրում են Քանաքեռ-Զեյթուն վարչական շրջանի Ծարավ Աղբյուրի փողոցում:
63-ամյա հոր վնասվածքը կրծքավանդակի ձախ կեսին է՝ սրտի մոտ: 40-ամյա որդու վնասվածքները նույնպես կրծքավանդակի ձախ կեսին են:
Բժիշկներին հաջողվել է փրկել նրանց կյանքը: Հայր և որդի վիրահատվել են ու գտնվում են բժիշկների հսկողության տակ:
Պարզվել է միջադեպի որոշ հանգամանքներ։ Նախնական տվյալների համապատասխան հայր և որդի Ծարավ Աղբյուրի փողոցում՝ իրենց տան մոտ, մեքենան վերանորոգելիս են եղել, երբ մեկ այլ մեքենայով փողոցով անցել է Քանաքեռում ապրող Թուրք Էմրե մականունով «հայտնի» 22-ամյա մի երիտասարդ։
Նրա և հիվանդանոց տեղափոխված անձանց միջև վեճ է սկսվել, ըստ որոշ տեղեկությունների՝ ճանապարհ զիջելու հետ կապված։ Վեճը թեժացել է, ուղեկցվել քաշքշոցով ու հայհոյանքներով և հանգուցալուծվել դանակահարությամբ։
Իրավապահները միջոցառումներ են ձեռնարկում նշված անձին ու հանցագործության գործիք դանակը հայտնաբերելու ուղղությամբ։