ԵՐԵՎԱՆ, 19 ապրիլի — Sputnik. Հայաստանի երկրորդ նախագահ Ռոբերտ Քոչարյանը, որին մեղադրում են սահմանադրական կարգը տապալելու մեջ, 2008 թվականի մարտի 1-ին ժողովրդին կրակելու հրաման չի տվել։ Այսօր Երևանում հրավիրված ասուլիսի ժամանակ այս մասին հայտարարեց Արցախի պաշտպանության բանակի նախկին հրամանատար Սամվել Բաբայանը։
2008 թվականի փետրվարի 19-ին նախագահի ընտրությանն իր թեկնածությունն առաջադրած և Սերժ Սարգսյանին պարտված նախագահ Լևոն Տեր–Պետրոսյանի գլխավորությամբ ընդդիմությունն Երևանի կենտրոնում հանրահավաքներ էր անցկացնում` բողոքելով քվեարկության պաշտոնական արդյունքների դեմ։ Բողոքի ցույցերը վերածվեցին զանգվածային անկարգությունների, մահացան 10 մարդ, մոտ 200 մարդ վնասվածքներ ստացան։
«Համոզված եմ և գիտեմ, որ հրամանը Քոչարյանը չի տվել։ Պետք չէ մոռանալ, որ մինչ այդ ընտրություններ են անցկացվել, 10 օր է անցել, և իշխանության փոխանցման գործընթաց էր տեղի ունենում», – ասաց Բաբայանը։
Նրա խոսքով` Մարտի 1-ի գործով բոլոր վկաները հայտարարում են, որ հրամանը տվել է մեկը «կառավարության շենքից, ոչ թե նախագահական նստավայրից»։ Բաբայանը նշեց` ակնհայտ բաներ կան, որոնք մարդիկ տեսնել չեն ցանկանում։
Նա, սակայն, չնշեց մարտի 1-ի մեղավորների անունները։
«Բոլորին, ովքեր կառավարության շենք են մտել, պետք է նկուղում հավաքել, և պատկերն անմիջապես կպարզվի։ Լյովա Երանոսյանին (այն ժամանակ բանակի երրորդ կորպուսի հրամանատար – խմբ.), որը անմիջականորեն ղեկավարում էր ժողովրդին կրակող ստորաբաժանումները, այսօր փոխանակ դատեն, դատում են անցած տարվա իրադարձությունների (թավշյա հեղափոխություն – խմբ.) ժամանակ լուսաձայնային նռնակ կիրառելու համար։ Այսօր ոչ ոք չի խանգարում հետաքննել այս գործը, ինչո՞ւ դա չեն անում», – հարցրեց Բաբայանը։
Քաղաքական գործիչը նաև հայտարարեց, որ նախկին իշխանությունները շահագրգռված չէին Մարտի 1-ի գործի բացահայտման հարցում, քանի որ իրենք են դրա մասնակիցը եղել։ Բաբայանն ընդգծեց, որ «գործը շատ խճճված է»։
Հիշեցնենք, որ ապրիլի 11-ին Վերաքննիչ դատարանը որոշեց Քոչարյանին թողնել կալանքի մեջ։ Մարտի 15-ին առաջին ատյանի դատարանը բավարարել էր Հատուկ քննչական ծառայության միջնորդությունը՝ Ռոբերտ Քոչարյանի նկատմամբ ընտրված խափանման միջոց կալանավորման ժամանակը ևս երկու ամսով երկարացնելու վերաբերյալ: Դատարանի հիշյալ որոշումը պաշտպանական խումբը բողոքարկել էր Վերաքննիչ դատարանում:
ՀՀ 2–րդ նախագահ Ռոբերտ Քոչարյանը 2018 թվականի հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։
Քննչական մարմինը Քոչարյանի նկատմամբ խափանման միջոց էր ընտրել կալանավորումը։
Առաջին ատյանի դատարանը Ռոբերտ Քոչարյանին կալանավորելու միջնորդությունը բավարարել էր, իսկ Վերաքննիչ դատարանը Քոչարյանին ճանաչել էր անձեռնմխելի և ազատել կալանքից:
Ավելի ուշ քրեական գործի նախաքննությունը վարող ՀՔԾ քննիչը որոշում էր կայացրել Ռոբերտ Քոչարյանի նկատմամբ խափանման միջոց ընտրել ստորագրությունը չհեռանալու մասին:
Իսկ Վճռաբեկ դատարանը փաստաբանների բողոքի հիման վրա որոշում էր կայացրել գործն ուղարկել լրացուցիչ քննության, որի ավարտին վերաքննիչ դատարանը Քոչարյանի նկատմամբ կիրառված կալանքը ուժի մեջ թողնելու որոշում էր կայացրել։ Այդ որոշման հիման վրա դեկտեմբերի 7-ին Ռոբերտ Քոչարյանը դարձյալ կալանավորվեց։