ԵՐԵՎԱՆ, 19 ապրիլի — Sputnik. Հայաստանի իշխանությունները գործարկել են E-Cult ինտերնետային համակարգը, որի միջոցով Հայաստանի աշակերտները կկարողանան տարին մեկ անգամ անվճար հաճախել թատրոն, կինո, համերգասրահ։
Այս մասին այսօր Facebook –յան օգտատերերի հետ ուղիղ կապի ժամանակ հայտարարեց ՀՀ վարչապետ Նիկոլ Փաշինյանը։
«Այն մարդը, ով մոտ է մշակույթին, 100 տոկոսով կրթված մարդ է»,–ասաց Փաշինյանը` համոզմունք հայտնելով, որ նման կերպ հնարավոր է որակյալ սերունդ կրթել։
Անդրադառնալով ֆեյսբուքյան օգտատերերի բարձրացրած հեռուստահաղորդումների որակի խնդրին` Փաշինյանն առաջարկեց հանրության մեջ հայտնի սերիալների միջոցով քաղաքացիներին փոխանցել պետության որոշակի մեսիջներ։
«Օրինակ` ինչպես է պետք վարկ վերցնել, որպեսզի հետո խնդիրների առաջ չկանգնեն։ Սերիալների միջոցով ցույց տալ հաջողված պատմություններ, թե ինչպես է մարդը աշխատանքով հասել հաջողության»,– ասաց Փաշինյանը։
Հիշեցնենք, որ ՀՀ վարչապետը Facebook-յան ուղիղ հեռարձակման միջոցով պատասխանում է օգտատերերի հարցերին։