Իշխանափոխությունից առաջ նախագահականից, կենտրոնական իշխանությունից կոնկրետ հրահանգ էր իջեցվում, թե որ իրադարձությունը և որ քաղաքական ուժն ինչպես պետք է լուսաբանվի։ Sputnik Արմենիայի եթերում այս մասին ասաց Շուշան Դոյդոյանը։
«Այսօր մեդիադաշտում կա ավելի լայն ազատություն, որոշ դեպքերում` նաև ազատության չարաշահում, ինչը հանգեցրեց վարչապետի կողմից կտրուկ միջամտությունների փորձերին, որոնք նույնպես տեղ են գտել «Լրագրողներ առանց սահմանի» միջազգային կազմակերպության հրապարակած հաշվետվությունում»,- ասաց Հայաստանում կազմակերպության ներկայացուցիչը։
«Լրագրողներ առանց սահմանի» միջազգային հեղինակավոր կազմակերպության կազմած վարկանիշային ինդեքսի համաձայն` 2018 թվականի արդյունքներով Հայաստանը մամուլի ազատության ինդեքսում աննախադեպ առաջընթաց է գրանցել՝ 19 կետով բարելավելով իր դիրքերը եւ հայտնվելով 61-րդ հորիզոնականում: Վարչապետ Նիկոլ Փաշինյանն այս առնչությամբ ֆեյսբուքում գրել էր` «Սա, ըստ էության, միջազգային արձանագրումն է իմ այն պնդման, թե Հայաստանում մամուլը երբեք ավելի ազատ չի եղել, քան այսօր»։
Ըստ Դոյդոյանի` առաջընթացի գրանցման ամենակարևոր պատճառն այն է, որ հեղափոխությունից հետո բացառվել է մեկ կենտրոնից հրահանգների իջեցումը` հատկապես հեռուստաոլորտին։