ԵՐԵՎԱՆ, 18 ապրիլի — Sputnik. Պարզվում է` Բաղրամյան 26-ն այնքան էլ բարեկարգ ու մաքուր վիճակում չէ։ Նման եզրակացության են հանգել ՀՀ նախագահի աշխատակազմում` իրենց հանձնած նոր նստավայրի շենքային պայմաններն ուսումնասիրելուց հետո։ Այս մասին ասված է այսօր կառավարության նիստում ընդունված որոշման նախագծում։
«Աշխատակազմն ուսումնասիրել է նշված հասցեում գտնվող վարչական շենքի վիճակը, պահպանման և շահագործման խնդիրները, կազմել թերությունների ակտեր, ինչպես նաև տարածքների մաքրման ծառայությունների ձեռքբերման նպատակով «Գնումների մասին» Հայաստանի Հանրապետության օրենքի 15-րդ հոդվածի 6-րդ մասի հիմքով կազմակերպել է համապատասխան գնման գործընթաց»,– ասված է նախագծում։
Այսպիսով, ուսումնասիրության արդյունքում նախագահի աշխատակազմը որոշել է Բաղրամյան 26-ում իրականացնել վարչական շենքի ընդհանուր օգտագործման ենթակա տարածքների նորոգման ու մաքրության աշխատանքներ` նախապես կազմակերպված գնման գործընթացի արդյունքում հաղթող ճանաչված ընկերության միջոցով:
Նշված աշխատանքների ծախսերն ընդհանուր կազմում են 40 000 000 դրամ։ Այդ գումարը կհատկացվի ՀՀ նախագահի աշխատակազմին բյուջեով հատկացված միջոցներից։
Ինչպես նշվում է որոշման նախագծում, առաջարկվող վերանորոգման նպատակն է «ստեղծել ավելի բարեկարգ և մաքուր շենքային պայմաններ, որի արդյունքում պատշաճ կապահովվի Հանրապետության նախագահի լիազորությունների իրականացումը, գործունեությունը և ներկայացուցչականությունը»:
Հիշեցնենք` ՀՀ նախագահ Արմեն Սարգսյանն իր աշխատակազմով Բաղրամյան 26 է տեղափոխվել 2019 թվականի մարտի 1-ից`2018 թվականի դեկտեմբերի 27-ին ընդունված որոշմամբ։
Մինչ այդ նախագահական նստավայրը տեղակայված էր Մաշտոցի պողոտա 47 հասցեում։ Իսկ Բաղրամյան 26-ում գործունեություն էր իրականացնում ՀՀ վարչապետի աշխատակազմը։