ԵՐԵՎԱՆ, 17 ապրիլի — Sputnik. Հայաստանի ԱԻՆ ղեկավար Ֆելիքս Ցոլակյանը խոստովանեց, որ Վանաձորի քիմիական գործարանի ապամոնտաժումը հղի է բնապահպանական ռիսկերով։
Այդ մասին նա ասաց չորեքշաբթի` պատասխանելով պատգամավորների հարցերին։
Ներկա պահին գործարանում պահպանվում է ամոնիակի որոշակի քանակություն, և եթե ժամանակին հարցը չլուծվի, ապա եղանակը տաքանալու հետ մեկտեղ կարող է տեղի ունենալ գոլորշիացում և նյութի արտանետում մթնոլորտ` այստեղից բխող բոլոր հետևանքներով։
Ինչպես հավաստիացրեց Ցոլակյանը, կառավարությունը հիմա զբաղվում է այդ հարցով, թեև այն լուծելը բարդ է։
Տարբերակներից մեկն այն Հայաստանից դուրս բերելն է, երկրորդը` հատուկ վառարաններում ոչնչացնելը։
Բայց Վրաստանի տարածքով դուրս բերելն անհնար է, հարևան պետությունը նման թույլտվություն չի տա։ Հայաստանում նույնպես չկան վայրեր, որտեղ հնարավոր կլինի դա չեզոքացնել։
Նախարարի խոսքով` կառավարությունը տվյալ փուլում մեխանիզմներ է որոնում բնապահպանական սպառնալիքը չեզոքացնելու համար։