ԵՐԵՎԱՆ, 17 ապրիլի — Sputnik. 1000 դրամների հիմնադրամում վճարումների հետ կապված խնդիրներ կան։ Այսօր ԱԺ–ում հարցուպատասխանի ժամանակ այս մասին հայտարարեց ՀՀ վարչապետ Նիկոլ Փաշինյանը` պատասխանելով «Լուսավոր Հայաստան» խմբակցության պատգամավոր Արմեն Եղիազարյանի հարցին։
Պատգամավորը հիշեցրեց Նիկոլ Փաշինյանի` ԵԽԽՎ–ի զեկույցում հնչեցրած այն ցուցանիշը, թե Հայաստանում 1 տարվա ընթացքում 50 000 աշխատատեղեր են դուրս եկել ստվերից։ Մինչդեռ պատգամավորի ներկայացրած տվյալներով` «Զինծառայողների ապահովագրության հիմնադրամը», որին յուրաքանչյուր աշխատողի աշխատավարձից տարեկան 1000 դրամ է փոխանցվում, ավելացել է ընդամենը 5 026 000 դրամով, ինչը նշանակում է, որ օրինական դաշտ է եկել 5026 աշխատող։
Պատգամավորը կասկած հայտնեց, որ Փաշինյանին ճիշտ թվեր չեն ներկայացվել։ Սակայն Փաշինյանը հայտարարեց, որ թվերը չեն կարող սխալ լինել, դրանք արտացոլված են ՊԵԿ–ի հրապարակած ցուցանիշներում։
«Մենք տեղեկություններ ենք ստանում, որ 1000 դրամները միշտ չէ և ամենուրեք չէ, որ պարտաճանաչ վճարվում են։ Նույնիսկ ամբողջական ընկերությունների մասին են ասել» ,– ասաց վարչապետը` հավելելով, որ պարզաբանումներ կպահանջի հիմնադրամից, կառավարությունն էլ այս ուղղությամբ միջոցներ կձեռնարկի։
ՀՀ վարչապետը վստահեցրեց, որ ստվերից դուրս եկած աշխատատեղերի տվյալների հետ կապված որևէ կասկած չունի։