ԵՐԵՎԱՆ, 17 ապրիլի — Sputnik. ՀՀ գլխավոր դատախազ Արթուր Դավթյանը չի հերքում `Պետական վերահսկողական ծառայության պետ Դավիթ Սանասարյանի նկատմամբ իրավական գործընթաց սկսելու մասին մամուլում տարածված լուրերը։ Ավելին` այսօր լրագրողների հետ զրույցում Դավթյանը խոստացավ առաջիկայում հանրությանն ավելի համապարփակ տեղեկատվություն տրամադրել այդ հարցի շուրջ։
Իսկ այս պահին նշեց, որ ավելին ասել չի կարող։
«Գործով քննությունը շարունակվում է, բնականաբար, բոլոր վարկածները ստուգվում են։ Թույլ տվեք ձեր հարցին այս պահին ուղիղ պատասխան չտալ»,– ասաց Արթուր Դավթյանը։
Հիշեցնենք` երեկ երեկոյան մամուլում լուրեր էին տարածվել, որ ՊՎԾ աշխատակիցներին վերաբերող քրեական գործով ՊՎԾ պետ Դավիթ Սանասարյանը ներգրավվել է որպես կասկածյալ, նրա նկատմամբ խափանման միջոց է ընտրվել ստորագրությունը չհեռանալու մասին։
ԱԱԾ–ն, որի վարույթում քննվում է նշված գործը, այս տեղեկություններն առայժմ ո՛չ հերքել, ո՛չ հաստատել է՝ խոստանալով ավելի ուշ պատասխանել։
Հիշեցնենք` Պետական վերահսկողական ծառայության գնումների վերահսկողության վարչության պետ Սամվել Ադյանը և ՊՎԾ մեկ այլ աշխատակից՝ բժշկական սարքավորումների մասնագետ Գևորգ Խաչատրյանը, փետրվարի 26-ին ձերբակալվել էին բժշկական հաստատությունների կողմից հայտարարված հեմոդիալիզի պարագաների մրցույթներին ենթադրյալ միջամտության դեպքով հարուցված քրեական գործի շրջանակում։
Փետրվարի 27-28-ի գիշերը կալանավորվել է նաև մինչ այդ նույն գործի շրջանակում հարցաքննված «Զորաշեն» ՍՊԸ-ի ներկայացուցիչ Տարոն Ավետիսյանը։
Նշենք, որ հենց այս կազմակերպությունն է տարիներ շարունակ հեմոդիալիզի պարագաներ մատակարարել «Սուրբ Գրիգոր Լուսավորիչ» բժշկական կենտրոնին։