ԵՐԵՎԱՆ, 16 ապրիլի — Sputnik. Գագիկ Ծառուկյանը Արարատի մարզ է այցելել Բելառուսի դեսպանատան դիվանագիտական համարանիշով ավտոմեքենայով: Այս մասին այսօր ԱԺ-ում լրագրողների հետ զրույցում հայտնեց ԲՀԿ նախագահ Գագիկ Ծառուկյանը:
«Փոխանակ ասեն, թե Ծառուկյանն ինչու է Արարատի մարզ գնացել, քննարկում են, թե Ծառուկյանի մեքենայի համարները կարմիր են, դեղին են, թե՞ սպիտակ են»,- ասաց նա` ավելացնելով, որ այդ համարանիշը բացառիկ վստահության, բարեկամական հարաբերությունների նշան է:
«Գագիկ Ծառուկյանի մեքենայի համարները Բելառուսի դեսպանատան դիվանագիտական համարներն են եղել: Բոլորդ էլ գիտեք, կապն էլ, հարգանքն էլ, վստահությունն էլ»,- ասաց նա:
Իսկ ավելի մանրամասն տեղեկություններ Ծառուկյանը լրագրողներին խորհուրդ տվեց ստանալ ՀՀ-ում Բելառուսի դեսպանատնից` պաշտոնական գրությամբ հարցում անելով ու իր ներկայացրած բոլոր փաստաթղթերին ծանոթանալով: