Արտգործնախարարները քննարկել են հումանիտար ոլորտում հնարավոր փոխգործակցությունը։ Նաև պայմանավորվել են փոխադարձության հիման վրա միջոցներ ձեռնարկել թույլատրելու կողմերի տարածքում կալանքի մեջ գտնվող անձանց հարազատների այցերը, միջոցներ ձեռնարկել մարդկանց միջև շփումների հաստատման ուղղությամբ, այդ թվում ԶԼՄ-ների փոխադարձ այցելությունների միջոցով։
Ըստ քաղաքագետի` համանախագահների այս հայտարարությունը, մեծ հաշվով, երկու հասարակությունների , երկու ժողովուրդների շփման ակտիվության մասին է, ինչը պիտի նպաստի երկու հասարակություններին խաղաղությանը նախապատելուն։
«Դրական է, որ հարցը քննարկվում է համանախագահների մակարդակով և համաձայնություն է ձեռք բերվում։ Այսինքն` հայկական կողմի խաղաղության օրակարգը կամաց–կամաց միս ու արյուն է ստանում»,–ասել է Բաղդասարյանը։
Քաղաքագետի գնահատմամբ` հատկապես կարևոր է գործակցությունը հումանիտար ոլորտներում։
«Կարծում եմ` սա համանախագահների արձագանքն է Արցախից հնչած այն առաջարկին, որ ադրբեջանցիների հետ կարող են համատեղ օգտագործել Սարսանգի ջրամբարը, Արցախի օդային տարածքն էլ պետք է բաց լինի։ Ենթադրում եմ, որ այս առաջարկներն արձագանք են ստացել և դա շատ կարևոր եմ համարում»,– ասել է քաղաքագետը։
Ըստ Բաղդասարյանի` Արցախը պատրաստ է կոնկրետ ինչ-որ բաներ առաջարկել`բանակցությունների սեղանի շուրջ վերադառնալու դիմաց։ Այդ հարցերի կարգավորումը ենթադրում է Արցախի և Ադրբեջանի իշխանությունների ուղիղ երկխոսություն։