ԵՐԵՎԱՆ, 13 ապրիլի – Sputnik. Բաթումում ընթացող Ծանրամարտի Եվրոպայի առաջնությունում այսօր՝ ապրիլի 13-ին, ծանրորդ Սամվել Գասպարյանը արծաթե մեդալի արժանացավ և նվաճեց Եվրոպայի փոխչեմպիոնի կոչումը։
Երկամարտում հայ ծանրորդը գրանցեց 377 կգ (168+209) արդյունք: Պոկում վարժությունում նա հաջող կատարեց միայն երրորդ մոտեցումը և ցուցադրեց 5-րդ արդյունքը, իսկ հրում վարժությունում նվաճեց փոքր արծաթե մեդալ:
«Չցուցադրեցի առավելագույն հնարավորություններս: Երևի մի քիչ խանգարեց լարվածությունը: Պատրաստ էի 5-ական կգ ավելի բարձրացնել մարզումներին ցուցադրածս արդյունքներից: Իմ կարծիքով, լարվածությունը խանգարեց: Կաշխատեմ իմ սխալների վրա։ Կձգտեմ ապագայում այս արդյունքը փոխել ոսկե մեդալով»,– ելույթից հետո ասել է Գասպարյանը:
Ծանրամարտիկը խոստացել է աշխատել լարվածությունը հաղթահարելու ուղղությամբ, որպեսզի աշխարհի առաջնությունում ոչինչ չխանգարի նրան։
Գասպարյանը հաղթանակը նվիրել է Յուրի Վարդանյանի վառ հիշատակին։