«Հայաստան» համահայկական հիմնադրամի գործադիր տնօրեն Հայկակ Արշամյանը պնդում է, որ ԶԼՄ–ներում տարածված հրապարակումն ամբողջությամբ կեղծ է։
«Ժամանակ» թերթը գրել էր, որ «Հայաստան» համահայկական հիմնադրամի ամենամյա հեռուստամարաթոնը այս տարի կարող է ընդհանրապես չանցկացվել: Ըստ պարբերականի` հիմնադրամի ամենամեծ` լոսանջելեսյան գրասենյակի աշխատանքները, ըստ էության, կաթվածահար են, քանի որ գրասենյակի մի շարք առանցքային աշխատողներ աշխատանքից ազատվելու դիմումներ են գրել՝ չցանկանալով աշխատել նոր իշխանության հետ:
«Այդ լուրը չի համապատասխանում իրականությանը»,- վստահեցնում է Արշամյանը։
Նրա խոսքով` դրական է, որ ՀՀՀ-ի փոփոխությունները մնում են ուշադրության կենտրոնում, և այդ փոփոխությունների շնորհիվ ամենամյա հեռուստամարաթոնն անցկացվելու է նոր և ավելի հետաքրքիր ձևաչափով։
«ՀՀՀ-ի թիմն այժմ աշխատում է հեռուստամարաթոնի նոր լուծումների վրա»,- ասաց Արշամյանը։
Այդուհանդերձ, նա չհերքեց, որ Լոս Անջելեսի գործադիր գրասենյակում եղել են կադրային փոփոխություններ։