ԵՐԵՎԱՆ, 11 ապրիլի — Sputnik. Ռոբերտ Քոչարյանը շատ հանգիստ է արձագանքել դատարանի որոշմանը, համենայն դեպս, շատ ավելի հանգիստ, քան իր պաշտպանները։ Այս մասին այսօր լրագրողների հետ զրույցում ասաց ՀՀ երկրորդ նախագահի պաշտպան Հայկ Ալումյանը։
Վերաքննիչ դատարանը որոշեց ՀՀ երկրորդ նախագահ Ռոբերտ Քոչարյանին թողնել կալանքի մեջ։ Մարտի 15-ին առաջին ատյանի դատարանը բավարարել էր Հատուկ քննչական ծառայության միջնորդությունը՝ Քոչարյանի նկատմամբ ընտրված խափանման միջոց կալանավորման ժամանակը ևս երկու ամսով երկարացնելու վերաբերյալ: Դատարանի հիշյալ որոշումը պաշտպանական խումբը բողոքարկել էր Վերաքննիչ դատարանում:
«Դատարանը, անտեսելով բոլոր հնարավոր նորմերը, Ռոբերտ Քոչարյանին կրկին պահեց կալանքի տակ։ Դատարանի որոշումը դեռ չենք ստացել, բայց այն պարտադիր բողոքարկելու ենք։ Առաջին ատյանի դատարանի որոշումն առհասարակ որևէ պատճառաբանություն իր մեջ չէր պարունակում, և մեր բողոքներից մեկի հիմքը հենց դա էր։ Սակայն Վերաքննիչ դատարանի վրա դա տպավորություն չթողեց»,–ասաց Ալումյանը։
Նա նշեց նաև, որ դատարանի որոշման փաստարկն այն է, որ, Քոչարյանն ազատության մեջ գտնվելով, կարող է խոչընդոտել գործի քննությանը, սակայն նախաքննություն արդեն ավարտվել է։ Պաշտպանի խոսքով` Քոչարյանի անձեռնմխելիության հարցը քննվում է նրան կալանավորելու հարցին զուգահեռ։
Հիշեցնենք, որ նախորդ տարվա հուլիսին Քոչարյանը ձերբակալվել է 2008 թվականի մարտին հանրապետությունում սահմանադրական կարգը տապալելու մեղադրանքով։ Նախկին նախագահի փաստաբանները նրան քաղբանտարկյալ են համարում ու վստահեցնում, որ նրան առնչվող քրեական գործընթացները բացարձակ ապօրինություն են։
2019-ի մարտի 15-ին ընդհանուր իրավասության դատարանը բավարարել է Հատուկ քննչական ծառայության միջնորդությունը՝ Ռոբերտ Քոչարյանին կալանքի տակ պահելու ժամկետը ևս 2 ամսով երկարացնելու վերաբերյալ: