ԵՐԵՎԱՆ, 11 ապրիլի — Sputnik. Համաշխարյշհային բանկի հետ համագործակցությունը շարունակելու ու նոր նախագծեր իրականացնելու համար Հայաստանը ստիպված կլինի լրացուցիչ բաժնեմասերի անդամագրվել։ Այս մասին այսօր կառավարության նիստում հայտարարեց ՀՀ ֆինանսների նախարար Ատոմ Ջանջուղազյանը` կառավարությանն առաջարկելով ընդունել ներկայացված առաջարկը։
«Մեր մասնակցությունն այսօր 0.7 տոկոս է, կամ 1642 բաժնեմաս ունենք ՀԲ–ում։ Որպեսզի պահպանվի մեր 0.7 բաժնեմասը, լրացուցիչ 324 բաժնեմասի ձեռք բերելու անհրաժեշտություն կա, որոնցից յուրաքանչյուրը 120 635 ԱՄՆ դոլար է»,– ասաց Ջանջուղազյանը` հավելելով, որ Հայաստանի անդամակցությւնը կարժենա ընդհանուր առմամբ 5.4 մլն դոլար, որը կվճարվի առաջիկա 3 տարիների ընթացքում համամասնորեն, տարեկան ծուրջ 1.8 մլն դոլար։
Կառավարությունն ընդունեց նախարարի առաջարկած նախագիծը` համաձայնելով լրացուցիչ բաժնեմաս ձեռք բերել ՀԲ–ից ու դրանով իսկ շարունակել համագործակցությունը միջազգային ֆինանսական այս կառույցի հետ։
Ջանջուղազյանը հայտնեց նաև, որ ՀՀ–ն այդ կարգով է աշխատել նաև մինչև այժմ։ Արդյունքում Համաշխարհային բանկի հետ ՀՀ համագործակցության տարիների ընթացքում իրականացվել են շուրջ 100 ծրագրեր` վարկային ու դրամանորհային։
Հայաստանի պարտքը ՀԲ–ին կազմում է 1.8 մլրդ դոլար, որի 600 մլն–ի չափով չօգտագործված գումարն է` ընթացքի մեջ գտնվող ծրագրերի մասով։