ԵՐԵՎԱՆ, 8 ապրիլի — Sputnik. Արտառոց դեպք է տեղի ունեցել Արարատի մարզում:
Այսօր՝ ապրիլի 8-ին, մի երիտասարդ բարձրացել է Արտաշատ քաղաքում տեղադրված «Վիվասել» ընկերությանը պատկանող ալեհավաքի աշտարակի վրա և սպառնացել, որ կնետվի ու կյանքին վերջ կտա:
Այդ մասին նա ահազանգել ու տեղեկացրել է իրավապահներին:
Մեր տեղեկություններով՝ 25-ամյա տղան ծնողներ չունի, եղբայրն էլ որոշ ժամանակ առաջ մահացել է: Կին ու մանկահասակ երեխա ունի, որոնք իր հետ չեն ապրում, քանի որ մշտական բնակավայր չունի:
Նախնական վարկածով՝ այդ ծայրահեղ քայլին դիմելու պատճառներն էլ սոցիալական բնույթ ունեն: Ըստ որոշ տեղեկությունների՝ Արտաշատի քաղաքապետը նրան կացարան ու փող է խոստացել, որոնք ստանալու համար էլ երիտասարդը սպառնացել է բարձր աշտարակից նետվել:
Տեղի ոստիկանները նրան համոզել են, որ հետ կանգնի ինքնասպանություն գործելու մտադրությունից և անվնաս իջեցրել են աշտարակից: