ԵՐԵՎԱՆ, 5 ապրիլի — Sputnik. «Թող ինձ տանեն, դատապարտեն, նստեցնեն»։ Գյումրիում ՀՀ վարչապետ Նիկոլ Փաշինյանն այսպես արձագանքեց ՀՀ մարդու իրավունքների պաշտպան Արման Թաթոյանի հայտարարությանը, թե քրեական գործ հարուցելու ցուցում տալու լիազորություն վերապահված է ոչ վարչապետին, այլ բացառապես դատախազին:
Խոսքը նախօրեին Նիկոլ Փաշինյանի ֆեյսբուքյան գրառման մասին է, որտեղ վարչապետը նշել էր. «Չեմ ուզում մազոխիստի տպավորություն թողնել, բայց ուզում եմ տեղեկացնել, որ իմ անմիջական ցուցումով քրեական գործ է հարուցվել իմ մի մերձավոր ազգականի թույլ տված ենթադրյալ չարաշահման փաստի առիթով»:
Զուգահեռ, ավելի պարզաբանելու համար, Facebook–ի իր էջում ՀՀ վարչապետը գրել է. «Հարգելիներս, ես ցուցում եմ տվել ստացված օպերատիվ տեղեկությանը օրենքով նախատեսված ընթացք տալու մասին, ինչի արդյունքում հարուցվել է քրգործ: Ցուցումը տվել եմ վարչապետին ենթակա մարմնին: Ամեն ինչ կարգին է, ամեն ինչ օրինական է: Շնորհակալ եմ ձեր մտահոգությունների համար»,-գրել է վարչապետը:
Հիշեցնենք, որ Փաշինյանի երեկվա գրառումից հետո, այսօր ՀՀ ՄԻՊ Արման Թաթոյանը, մեկնաբանելով վարչապետի գրառումը, նշել էր, որ քրեական գործ հարուցելու ցուցում տալու լիազորություն վերապահված է բացառապես դատախազին և ոչ վարչապետին: