ԵՐԵՎԱՆ, 5 ապրիլի – Sputnik. ՀՀ վարչապետ Նիկոլ Փաշինյանը քիչ առաջ «Սասունցի Դավիթ» կայարանից նոր արագընթաց էլեկտրագնացքով մեկնեց Գյումրի։
Մեկնելուց առաջ նա շրջեց կայարանի թանգարանում։
Գյումրիում Նիկոլ Փաշինյանը շրջելու է փողոցներով, ծանոթանալու է փողոցաշինության աշխատանքներին, այցելելու է «Շիրակ» օդանավակայան, լինելու է տնակային թաղամասում։
Նշենք, որ «Հարավկովկասյան երկաթուղի» ՓԲԸ–ն նոր էլեկտրագնացքը գնել է ռուսական «Տրանսմաշհոլդինգ» ընկերությունից:
Էլեկտրագնացքը կաշխատի ուրբաթ, շաբաթ և կիրակի օրերին էքսպրեսի ռեժիմով՝ առանց բաժանիչ կանգառների: Սա արդեն երկրորդ ժամանակակից որակյալ շարժակազմն է, որը կաշխատի ամենածանրաբեռնված ներհանրապետական երթուղում:
Նոր էլեկտրագնացքի երթևեկության տևողությունը 2 ժամ 10 րոպե է: Արագընթաց գնացքները կաշխատեն օրը 4 անգամ՝ ժամը 09:40–ին և 17:15-ին մեկնելով Երևանից Գյումրի և 09:05–ին և 17:10-ին վերադառնալով մայրաքաղաք: