Նախարարությունը տեղեկացրել է, որ գնումների ոլորտի նախատեսվող փոփոխությունների մասով բաց է համագործակցության համար ու կոչ է արել շահագրգիռ կողմերին ներկայացնել իրենց առաջարկներն օրենսդրական ակտերում փոփոխություններ կատարելու նպատակով։
Տնտեսագետ Գայանե Գաբրիելյանը Sputnik Արմենիայի հետ զրույցում դրական է գնահատել շահագրգիռ կողմերի հետ գնումների ոլորտի օրենսդրական փոփոխությունները քննարկելու ֆինանսների նախարարության պատրաստակամությունը։
«Ես կարող եմ պնդել, որ այսօր պետական գնումների ոլորտում ընթացիկ վերահսկողությունն ամբողջովին բացակայում է»,-փաստում է տնտեսագետը։
Նրա խոսքով, եթե ժամանակին կային վերահսկողության ինչ-որ լծակներ, այսօր դրանք բացակայում են։
«Այսօր մենք անցել ենք գնումների էլեկտրոնային համակարգի երրորդ փուլին, որն իրենից ենթադրում է էլեկտրոնային աճուրդների մուտքը: Սակայն այն ձախողվեց, և այս պահի դրությամբ էլեկտրոնային աճուրդների գործընթացը կասեցվել է»,-արձանագրում է Գայանե Գաբրիելյանը։
Ինչ վերաբերում է գնումների բողոքարկման խորհրդին, ըստ տնտեսագետի, խորհուրդն այսօր առավելագույնս թափանցիկ է աշխատում։