Նելլի Դանիելյան, Sputnik Արմենիա
Այն մագնիսական ուժը, որը մարզերի բնակիչներին ձգում է դեպի Երևան, ուղղությունը պիտի փոխի դեպի մարզեր։ Sputnik Արմենիայի հետ զրույցում այսպես ասաց Քաղաքաշինության կոմիտեի նորանշանակ նախագահ, ճարտարապետ Վահագն Վերմիշյանը։
«Գյուղը պիտի զարգացնենք, գյուղի և քաղաքի կյանքի որակի կատաստրոֆիկ տարբերությունը պիտի վերացնենք, որպեսզի գյուղացին այսօր ունենա նմանատիպ կյանքի որակ, ինչ քաղաքի կենտրոնում բնակվողը»,– ասաց նա։
Տարաբնակեցման խնդիրը լուծելու հիմանական գրավականը քաղաքաշինության կոմիտեի ղեկավարը համարում է մարզերում պետական բնակարանաշինական ծրագրերի իրականացումը։
Վահագն Վերմիշյանն արդեն իսկ նման ծրագիր է հղացել, որի համաձայն նորաստեղծ ընտանիքները, որոնք հնարավորություն չունեն նոր բնակարան գնելու, կարող են այն վարձակալել պետությունից։
«Բնակարանի դիմաց սիմվոլիկ գումար կվճարեն, օրինակ` 10 դոլար ամսական»,– ասաց Վերմիշյանը։
Նրա խոսքով` քաղաքաշինության կոմիտեն այժմ աշխատում է ծրագրի վրա, և հույս կա, որ մինչև մայիս այն արդեն կներկայացվի կառավարությանն ու հանրությանը։
Գործադրի հավանությանն արժանանալուց հետո բնակարանաշինական ծրագրի առաջին փուլը կմեկնարկի Հայաստանի երկու խոշոր քաղաքներում` Գյումրիում ու Վանաձորում և Հայաստանի մի քանի գյուղերում։ Առաջին պետական շենքերն էլ մարզերում կկառուցվեն արդեն ծրագրի հաստատումից հետո 1-2 տարի հետո։
Ընդ որում, պետական շինարարություն լինելով հանդերձ, Վահագն Վերմիշյանի համար առաջնային է հատկապես շինարարության որակյալ լինելը։
Ինչ վերաբերում է Հայաստանում իրականացվող շինարարության որակին, Վահագն Վերմիշյանի դիտարկմամբ, 1993-2019թթ.–ին Հայաստանում շինարարության ոլորտը միայն անկում է ապրել։ «Տնտեսության առաջատար ոլորտ համարվող շինարարությունը մենք հասցրել ենք մի չքավոր վիճակի, –ասաց նա,– Հայաստանում որոշ շինկազմակերպությունների կողմից սարսափելի որակի շինարարություն է արվում»։
Քաղաքաշինության կոմիտեի ղեկավարը համոզված է` այն շինարարը, որ սեյսմիկ գոտում անորակ շինարարություն է իրականացնում, «դինոզավրի պես պիտի վերանա»։
Վերմիշյանի համոզմամբ, Հայաստանում պետք է մնան միայն որակյալ շինարարները, ովքեր իրենց բիզնեսը շուկայում կազմակերպում են նորովի։