Շինարարությունը տարիների ընթացքում հասցվել է չքավոր վիճակի, ինչի համար պատճառ են հանդիսացել և՛ արտագաղթը, և՛ տնտեսության վիճակը։ Sputnik Արմենիային այս մասին ասաց Քաղաքաշինության կոմիտեի նախագահ Վահագն Վերմիշյանը։
«Ես կարծում եմ, որ մոտ ապագայում` մոտակա 2-3 տարվա ընթացքում, շինարարական «բում» կլինի»,- ասաց նա։
Պաշտոնյայի խոսքով` քաղաքաշինության կոմիտեն մշակում է նոր մեխանիզմներ` ոլորտը կարգավորելու և վերահսկելու համար։
«Որոշ կազմակերպություններ իրականացնում են սարսափելի վատ որակի շինարարություն, նման կազմակերպությունները պետք է վերանան, ու մնան որակյալ աշխատանք կատարողները»,- վստահեցրեց քաղաքաշինության կոմիտեի ղեկավարը։
Վերմիշյանը նշեց, որ կոմիտեի հիմնախնդիրներից մեկն էլ տարաբնակեցումն է։
«Մայրաքաղաքը գերբնակեցնելու փոխարեն, բնակչության ուղղությունը պետք է փոխվի դեպի մարզեր` գյուղերը զարգացնելու, դրանցում ենթակառուցվածքներ ստեղծելու միջոցով»,- ասաց Վերմիշյանը։
Ինչ վերաբերում է Երևանին, ապա Վերմիշյանը համաձայն չէ այն կարծիքի հետ, որ մայրաքաղաքը կորցրել է իր դեմքը։