ԵՐԵՎԱՆ, 29 մարտի — Sputnik. Սպենդիարյանի անվան օպերայի և բալետի ազգային ակադեմիական թատրոնի կոլեկտիվը` գեղարվեստական ղեկավար Կոնստանտին Օրբելյանի հետ միասին մտադիր են դատի տալ մշակույթի նախարարի պաշտոնակատար Նազենի Ղարիբյանին։
Մարտի 26-ի երեկոյան, Կոնստանտին Օրբելյանը նամակ էր ստացել, որտեղ նշված էր, որ ապրիլի 1-ից նա այլևս չի զբաղեցնում թատրոնի տնօրենի պաշտոնը։
«Նազենի Ղարիբյանը կարծում է, որ իմ նշանակումն անօրինական է եղել։ Ինձ պետությունն է նշանակել։ Գուցե նա Գերագույն դատարանի նախագա՞հն է։ Ինձ ազատել են տնօրենի պաշտոնից, իսկ գեղարվեստական ղեկավարին նշանակում է տնօրենը», – լրագրողների հետ զրույցում ասաց Օրբելյանը։
Նրա խոսքով` Ղարիբյանը վաղուց էր ուզում դա անել։ Օրբելյանն ընդգծեց, որ երեկ նրան ապշահար զանգահարել է ՀՀ մշակույթի նախկին նախարար, «Իմ քայլը» խմբակցության ղեկավար Լիլիթ Մակունցը։
«Նա ինձ զանգահարեց ժամը 22:00–ի սահմաններում և ասաց, որ զարմացած է», – պատմեց Օրբելյանը։
Օրբելյանը նշեց, որ թատրոնի անձնակազմը, ինչպես նաև ինքը մտադիր են դատարան դիմել։ Նա հիմա գիրք է գրում Հայաստանում իր կյանքի մասին և անպայման այնտեղ կպատմի այս մասին։ Ընդհանուր առմամբ, իր համար հետաքրքիր իրավիճակ է ստեղծվել։
«Ես 1.5 տարի է ինչ աշխատում եմ որպես տնօրեն։ Մենք թատրոնի համար արել ենք չլսվածը, զրոյից հյուրախաղեր և ներկայացումներ ենք կազմակերպել», – ասաց Օրբելյանը։
Նա նշեց, որ շարունակում է մնալ թատրոնում, սակայն ինչ կարգավիճակով դեռ տեղյակ չէ։
Թատրոնի աշխատակիցներն իրենց հերթին մտադիր են վաղը հանդիպել Ղարիբյանի հետ` իրավիճակը պարզաբանելու համար։ Նրանք Ղարիբյանի որոշումը սխալ են համարում։