ԵՐԵՎԱՆ, 29 մարտի — Sputnik. Հայաստանն օգնություն կտրամադրի Իրանի ջրհեղեղից տուժած քաղաքացիներին: Այս մասին այսօր կառավարության նիստում հայտարարեց ՀՀ ԱԻ նախարար Ֆելիքս Ցոլակյանը:
Նա հայտնեց, որ երեկ է հանդիպել Հայաստանում ԻԻՀ դեսպանի հետ: Հանդիպման ընթացքում պայմանավորվածություն է ձեռք բերվել Իրանին օգնություն ցուցաբերելու վերաբերյալ:
«Օգնությունը մենք ուղարկում ենք հայ-ռուսական հումանիտար աջակցության կենտրոնի միջոցով: Ուղարկելու ենք նաև տեխնիկական միջոցներ, ավտոմեքենաներ, փրկարարական խմբեր»,- ասաց Ցոլակյանը:
Հարցի հրատապությունից ելնելով` նախարարն առաջարկեց այն կարգավորել ոչ թե կառավարության որոշմամբ, այլ վարչապետի:
Նիստը վարող փոխվարչապետ Տիգրան Ավինյանը խոստացավ հարցը կարգավորել օրվա ընթացքում:
Հիշեցնենք, որ Իրանի մի շարք նահանգներում անցյալ շաբաթ տեղի ունեցած ջրհեղեղի հետևանքով զոհերի թիվը հասել է 44-ի:
Ջրհեղեղի պատճառով, որն առաջացել է հորդառատ անձրևների հետևանքով, Իրանի մի շարք շրջաններում ճանապարհները լվացվել են, վնասվել են ենթակառուցվածքներն ու տները, կաթվածահար է եղել տրանսպորտային հաղորդակցությունը: