ԵՐԵՎԱՆ, 29 մարտի — Sputnik. «Փաստ» թերթն այսօրվա իր համարում անդրադարձել արդարադատության 2 փոխնախարարների` աշխատանքից ազատելու պատճառներին։ «Օրերս արդարադատության փոխնախարարներ Արթուր Հովհաննիսյանին և Սուրեն Քրմոյանին աշխատանքից ազատելու պատճառը եղել է զուտ քաղաքական: Ի դեպ, դա փաստացի ակնարկել է նաև արդարադատության նախարարը՝ նշելով. «Մենք բավարարված ենք, շատ բարձր ենք գնահատում նրանց կատարած աշխատանքը, պրոֆեսիոնալիզմը: Սա քաղաքական թիմի, քաղաքական թիմով աշխատելու որոշում է»,–գրում է թերթը:
«Փաստի» տեղեկություններով՝ շրջանառվող այն լուրերը, թե փոխնախարարներն ազատվել են, որովհետև Ամանորի տոներին չեն անսացել վարչապետի հորդորին և ՀՀ սահմաններից դուրս են նշել Նոր տարին, ընդամենը շղարշային պատճառաբանություններ են. փոխնախարարներն իրենց անմիջական վերադաս Արտակ Զեյնալյանին նախապես տեղեկացրել են այդ մասին:
«Ստացվում է, որ երկու պրոֆեսիոնալ փոխնախարարները, որոնց ուսերին էին նախարարության կողմից ողջ օրենսդրական նախաձեռնություններն ու ընդհանուր փաթեթների կազմումը, իրենց պաշտոններից ազատվել են ընդամենը իշխանության թիմում «սվոյ» չլինելու պատճառով»,-գրում է թերթը։
Հիշեցնենք, որ մարտի 22–ին ՀՀ վարչապետ Նիկոլ Փաշինյանի որոշմամբ` արդարադատության երկու փոխնախարարները` Սուրեն Քրմոյանը և Արթուր Հովհաննիսյանն ազատվել են զբաղեցրած պաշտոններից։Ի դեպ, Սուրեն Քրմոյանը պաշտոնավարում էր 2014թ. մայիսի 22-ից, իսկ Արթուր Հովհաննիսյանը` 2016–ի հոկտեմբերի 16–ից։