ԵՐԵՎԱՆ, 27 մարտի — Sputnik. Թբիլիսցի լուսանկարիչ Յուրի Ակոպովը հայտնվել է լավագույն լուսանկարիչների եռյակում և դարձել «Արծաթե ֆոտոխցիկի» դափնեկիր «Հարսանեկան նկարահանում» անվանակարգում, հաղորդում է Sputnik Գրուզիան։
Եվրոպական լուսանկարիչների ֆեդերացիայի պարգևատրման արարողությունը կայացել է ավստրիական Ինսբրուկ քաղաքում։
Ինչպես ասել է Ակոպովը, նման հեղինակային մրցույթներում հաղթանակը վստահություն է ներշնչում, որ դու քո գործի պրոֆեսիոնալն ես։
«Մրցույթներն օգնում են օբյեկտիվ գնահատել ստեղծագործությունը, պրոֆեսիոնալ առումով զարգացնում են, թարմ շունչ հաղորդում, խթանում ինչ–որ նոր բանի ստեղծումը։ Դու զգում ես, որ չես դոփում տեղում։ Դրանք նաև օգնում են գիտակցել սեփական հմտությունները և կարողությունները, համեմատել քո ձեռքբերումները գործընկերների արդյունքների հետ։ Միաժամանակ հասկանում ես` ինչով ես շահում, ինչ չգիտես, որտեղ կարող ես ջանքեր գործադրել և դրսևորել քո ընդունակությունները», – ասում է Ակոպովը։
Լուսանկարիչը նաև նշում է, որ նման հաղթանակները պատվիրատուների են գրավում։ Նա ամեն դեպքում խորհուրդ է տալիս մասնակցել։ Ակոպովի խոսքով` նույնիսկ պարտության դեպքում լուսանկարիչը փորձ է ձեռք բերում։
Յուրի Ակոպովը հարսանեկան, դիմանկարային, նորաձևության և կոմերցիոն նկարահանումների վարպետ է։ Եվրոպական պրոֆեսիոնալ լուսանկարներից ֆեդերացիայի անդամ է և Ամերիկայի լուսանկարչական միության բրոնզե մեդալակիր։
Նա 2017թ–ից մասնակցում է «Տարվա եվրոպական լուսանկարիչ» մրցույթին։ Այդ ժամանակ հաղթել է «Հարսանեկան լուսանկարահանում» անվանակարգում և դարձել «Ոսկե ֆոտոխցիկի» դափնեկիր։ Հաջողությունը չի լքել թբիլիսցի լուսանկարչին նաև 2018թ–ին, այդ ժամանակ նա զբաղեցրել է 4–րդ տեղը։
Եվրոպական պրոֆեսիոնալ լուսանկարիչների ֆեդերացիան (Federation of European Photographers, FEP) հիմնվել է 1999թ–ին։ Այն միջազգային ճանաչում ունեցող ոչ կոմերցիոն կազմակերպություն է լուսանկարիչների համար, որոնք համագործակցում են ամբողջ աշխարհի լուսանկարիչների հետ։ Դրա հարթակում ներկայացված են ավելի քան 50 000 պրոֆեսիոնալ լուսանկարիչներ և իմիջմեյքերներ ԱՄՆ–ից, Ռուսաստանից և Եվրոպայի երկրներից։ Պարգևատրման արարողության ժամանակ բոլոր անվանակարգերի եզրափակիչ դուրս եկած լուսանկարիչներին շնորհում են 10–ից 1–ին տեղերը։ Առաջին երեք տեղերի հաղթողները ստանում են ոսկե, արծաթե և բրոնզե ֆոտոխցիկներ։