ԵՐԵՎԱՆ, 22 մարտի — Sputnik. ՀՀ գաղտնալսող սարքեր չեն կարող ներկրվել։ Այս մասին այսօր ԱԺ պաշտպանության և անվտանգության հարցերի մշտական հանձնաժողովի նիստում ասաց ԱԱԾ տնօրեն Արթուր Վանեցյանը` պատասխանելով Հայաստանում պաշտոնյաների հեռախոսային խոսակցությունների գաղտնալսման դեպերին։
«Չեմ կարող ստույգ ասել` նախկինում ներկրվել են, թե ոչ։ Բայց հիմա դա կարգավորվում է օրենքով, և դրա իրավունքը ունեն միայն պետական հատուկ ծառայությունները»,– ասաց Վանեցյանը։
Ինչ վերաբերում է պաշտոնյաների գաղտնալսումներին, ԱԱԾ տնօրենը հիշեցրեց, որ այդ փաստով հարուցված է քրեական գործ, որն այժմ նախաքննության փուլում է, և որում ինքը ևս ներգրավված է։ Վանեցյանը հրաժարվեց պատասխանել պատգամավորների հարցերին` նշելով, որ իրավունք չունի հրապարկել նախաքննության նյութերը։
Հիշեցնենք` 2018թ–ի սեպտեմբերի 11-ին համացանցում տարածվել էր Հայաստանի Ազգային անվտանգության ծառայության տնօրեն Արթուր Վանեցյանի և Հատուկ քննչական ծառայության տնօրեն Սասուն Խաչատրյանի հեռախոսազրույցի ձայնագրությունը։ 8 րոպեանոց հեռախոսազրույցի ընթացքում նրանք քննարկում են Հայաստանի նախկին նախագահ Ռոբերտ Քոչարյանի կալանքը, ինչպես նաև ՀԱՊԿ գլխավոր քարտուղար Յուրի Խաչատուրովի և ՊՆ նախկին ղեկավար Միքայել Հարությունյանի դեմ հարուցված քրեական գործերը։ Նախկին 3 պաշտոնյաները մեղադրվում են 2008թ.-ի մարտի դեպքերի ժամանակ սահմանադրական կարգը տապալելու մեջ, որը հանգեցրել է 10 մարդու մահվան։
Առաջին գաղտնալսման հրապարակումից մի քանի ամիս անց համացանցում հայտնվեց նաև հեռախոսային խոսակցության երկրորդ մասը:
ՀՀ քննչական կոմիտեում գաղտնալսումների փաստով հարուցվել է քրեական գործ, որը դեռ նախաքննության փուլում է։ ԱԱԾ տնօրեն ու ՀՔԾ պետն այս գործով նախաքննական ցուցմունք են տվել։