ԵՐԵՎԱՆ, 21 մարտի – Sputnik. Շվեդական Volvo ընկերությունը ներկայացրել է նոր համակարգ, որը երթևեկության ժամանակ տեսախցիկների միջոցով հետևելու է վարորդի դեմքի միմիկաներին և բիբերի արձագանքներին։ 2020 թվականից սկսած` նմանատիպ համակարգեր կտեղադրվեն ընկերության արտադրած բոլոր ավտոմեքենաներում։ Ընկերությունն այս մասին հայտնում է իր պաշտոնական կայքում։
Տեսախցիկներն ուշադրություն չեն դարձնելու մանր փոփոխություններին, բայց եթե ղեկի դիմաց գտնվողը երկար ժամանակ չհետևի ճանապարհին, կստանա զգուշացում, որը կերևա վարորդական էկրանին կամ կարտահայտվի ձայնային ազդանշանի միջոցով։
Համակարգն ամբողջովին կակտիվանա, եթե «հասկանա», որ վարորդի վարքագիծը կարող է լուրջ ազդեցություն ունենալ նրա առողջության կամ կյանքի վրա։ Օրինակ` եթե տեսախցիկները նկատեն, որ վարորդը ննջել է, մեքենան ինքնուրույն կսկսի արգելակել, այնուհետև դուրս կգա երթևեկելի հատվածից և կանգ կառնի։
Հիշեցնենք` 2019 թվականի մարտի սկզբին ընկերությունը հայտարարել էր, որ 2020 թվականից թողարկվող մեքենաները չեն գերազանցի 180 կմ/ժ արագությունը` անվտանգությունը պահպանելու նկատառումով։
1927 թ.–ին Շվեդիայում ստեղծված Volvo ընկերությունը նմանատիպ նորարարությունների շնորհիվ Forbes-ի վերլուծությամբ համարվում է ամենաանվտանգ մեքենայի ` Volvo S60–ի արտադրողը։