Դանակով կրծքավանդակի ձախ կողմում վնասվածք ստացած տղային վիրահատում են. նոր մանրամասներ

ԵՐԵՎԱՆ, 21 մարտի — Sputnik. Մեր տեղեկություններով` քիչ առաջ դանակահարված վիճակում թիվ 1 համալսարանական հիվանդանոց տեղափոխված 28-ամյա Էդգար Զաքարյանը Գյումրու բնակիչ է: Մյուս վիրավորը՝ 27-ամյա Միքայել Մելիքյանը, ապրում է Կոտայքի մարզի Առինջ գյուղում։

Նրանց դանակահարել են Չարենցի փողոցում գտնվող Խրիմյան Հայրիկի անվան թիվ 10 հիմնական դպրոցի բակային տարածքում, որտեղ իրավապահները հայտնաբերել են արյան հետքեր։

Մի քանի երիտասարդի մասնակցությամբ խմբակային վեճ է եղել, որի ընթացքում էլ տղաներին հարվածել էին դանակով։

Նրանցից մեկը դժվարությամբ դուրս է եկել փողոց ու տաքսի կանգնեցրել, որով էլ տեղափոխվել են հիվանդանոց։

Մեր տեղեկություններով Էդգար Զաքարյանի վնասվածքը կրծքավանդակի ձախ հատվածում է. այս պահին նրան վիրահատում են։ Իրավապահները պարզում են կատարվածի հանգամանքները։

Հիշեցնենք, ավելի վաղ Sputnik Արմենիան տեղեկացրել էր Երևանի կենտրոնում տեղի ունեցած դանակահարության մասին: