ԵՐԵՎԱՆ, 17 մարտի –Sputnik. Հռոմի Ֆրանցիսկոս պապը ցավակցություն է հայտնել Նոր Զելանդիայի Քրայսթչերչ քաղաքի մզկիթներում տեղի ունեցած ահաբեկչությունների զոհերի ընտանիքներին և հավատացյալներին կոչ արել հակազդել ատելությանն ու բռնությանը, հայտնում է ՌԻԱ Նովոստին։
«Այս օրերին հակամարտությունների և պատերազմների ցավին, որոնք չեն դադարում տանջել մարդկությանը, ավելացավ նոր ցավ` Նոր Զելանդիայի Քրայսթչերչ քաղաքի երկու մզկիթների վրա տեղի ունեցած սարսափելի հարձակումը։ Աղոթում եմ զոհերի հոգիների և վիրավորների ու նրանց հարազատների համար», – ասել է հովվապետը Վատիկանի Սուրբ Պետրոսի հրապարակում ավանդական կիրակնօրյա քարոզի ժամանակ։
Հռոմեակաթոլիկ եկեղեցու ղեկավարը հորդորել է`«նեցուկ լինել մեր եղբայր մուսուլմաններին» և կրկին կոչ արել բոլոր հավատացյալներին «միավորվել խաղաղության աղոթքում և ժեստերում` ատելությանն ու բռնությանը հակազդելու համար»։
Հիշեցնենք` Նոր Զելանդիայի Քրայսթչերչ քաղաքի մզկիթներում մարտի 15-ի վաղ առավոտյան հրաձգություն էր տեղի ունեցել, որի հետևանքով մի քանի տասնյակ մարդիկ էին մահացել։ Հրաձիգներից մեկը` Բրենտոն Տարանտը, ավստրալիական ծագում ունեցող 28-ամյա տղամարդ է, նա 17 րոպե իր սոցցանցում տեսահեռարձակել է, թե ինչպես է մզկիթում գնդակահարում մարդկանց։ Տեղի ունեցածից առաջ նա 37 էջանոց ուղերձ է գրել, որում պարզաբանել է` ով է ինքը և ինչու է կրակ բացել մզկիթում։
Ուղերձում նա հայտարարել է, որ դա «ահաբեկչական հարձակում է»։ Հարձակման հետևանքով ձերբակալել են 4 կասկածյալ` 3 տղամարդ և մեկ կին։Բրենտոնին մեղադրանքներ են առաջադրվել սպանության համար, շաբաթ օրը դատարանը նրա կալանքը հետաձգել է մինչև ապրիլի 5-ը։ Նոր Զելանդիայի վարչապետ Ջասինդա Արդերնը տեղի ունեցածն ահաբեկչություն է անվանել։ Հայտնի է, որ մզկիթներից մեկում միջադեպի պահին շուրջ 300 մարդ է եղել։ Նոր Զելանդիայի Քրայսթչերչ մզկիթներում տեղի ունեցած հրաձգության հետևանքով զոհերի թիվը, վերջին տվյալներով, հասել է 50-ի։