ԵՐԵՎԱՆ, 13 մարտի — Sputnik. Աջ ղեկով ավտոմեքենաների ներմուծման ժամկետը երկարացնող օրենքի նախագծի ընդունումից հետո Հայաստանի սահմանը հատելու իրավունք կստանան միայն այն մեքենաները, որոնք ձեռք են բերվել մինչև 2018թ.-ի դեկտեմբերի 30-ը: Այս մասին այսօր ԱԺ-ում, օրենքի նախագծի քննարկման ժամանակ, հայտարարեց ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը:
«Ձեռք բերում նշանակում է, որ մաքսային մարմինը պետք է համապատասխան փաստաթղթեր ստանալուց հետո արձանագրի, որ նշված գույքը գնվել է մինչև 2018թ.-ի դեկտեմբերի 30-ը: Նաև ուզում եմ նշել, որ 30-ն է նշված, ոչ թե 31-ը»,- ասաց նախարարը:
Նախագիծը ներկայացնելիս` Արշակյանը նշեց, որ ժամկետը երկարացնելու որոշում կայացնելիս, կառավարությունն ի սկզբանե նույնիսկ գաղափար չուներ, թե սահմանին կուտակված ու դեռևս դեպի Վրաստան ճանապարհին գտնվող ավտոմեքենաների ինչ քանակի մասին է խոսքը: Բայց, երբ «Աջ ղեկ» նախաձեռնության անդամները ներկայացրին նման մեքենաների ցուցակը, պարզ դարձավ, որ խոսքը շուրջ 1000 ավտոմեքենայի մասին է:
Նշենք, որ օրենքի փոփոխությունով կառավարությունը մտադիր է այդ ավտոմեքենաների ներմուծման վերջնաժամկետ սահմանել 2019թ.-ի մայիսի 1-ը:
Ի դեպ, քննարկման ժամանակ նախարարը մի քանի անգամ շեշտեց, որ օրենքի փոփոխություն այլևս չի լինելու, և կառավարությունը վերջին զիջումն է անում աջ ղեկով ավտոմեքենա ներկրողների համար:
Կառավարության առաջարկած նախագիծն այս պահին քննարկվում է ԱԺ արտահերթ նիստում: Այն նախատեսվում է ընդունել հրատապ կարգով` 24 ժամվա ընթացքում:
«Աջակողմյան ղեկային տեղաբաշխմամբ տրանսպորտային միջոցների ներմուծումն արգելելու մասին օրենքում փոփոխություններ կատարելու օրենքի նախագիծը» կառավարությունն ընդունել էր մարտի 7-ի նիստում և ներկայացրել ԱԺ` արտահերթ քննարկման:
Հիշեցնենք` կառավարության նիստում նախարար Հակոբ Արշակյանը հայտարարել էր, որ արդեն գնված ու Հայաստան ուղևորվող շուրջ 412 ավտոմեքենա կա, մոտավորապես նույն քանակի ավտոմեքենաներ էլ արդեն կուտակված են Հայաստանի սահմանին: