ԵՐԵՎԱՆ, 12 մարտի — Sputnik. ՀՀ կառավարությունն աշխատանքային խումբ կստեղծի օնլայն տեղեկատվական հարթակների` YouTube-ի, Google-ի հայաֆիկացման հնարավորությունն ուսումնասիրելու ու դրան աջակցելու համար։
Այս մասին այսօր ԱԺ–ում, լրագրողների հետ զրույցում ասաց ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը` անդրադառնալով հայ երիտասարդ բլոգերների նախաձեռնությանը։
«Մեր մոտ նախաձեռնողականությունը միշտ ողջունվել է, և շատ կարևոր է, որ մեր հանրությունը, բլոգերները, ովքեր շահառուն են Youtube-ի հայաֆիկացման, վեր հանեցին խնդիրը: Հոլովակներ էին ստեղծել, գրագետ մատուցեցին»,– ասաց նախարարը։
Արշակյանը խոստացավ, որ հարցի ուսումնասիրության նպատակով աշխատանքային խումբ կստեղծվի և առաջարկեց հետաքրքրված անձանց հայտնել իրենց տեսակետը։
Արշակյանը չբացառեց, որ այս ոլորտի կանոնակարգումը կհամապատասխանեցվի հարկային բարեփոխվող օրենսգրքի պահանջներին:
«Դա ցանկացած տնտեսվարող սուբյեկտին է վերաբերում, Հարկային օրենսգրքում փոփոխություններ են տեղի ունենում, որով միկրոբիզնեսը չի հարկվելու»,-պարզաբանեց Արշակյանը:
Նախարարը շեշտեց, որ գործընթացը պայմանավորված է տեխնոլոգիական ոլորտի զարգացման, Հայաստանն աշխարհի քարտեզի վրա հայտնի դարձնելու, նոր բիզնես մոդելներ ստեղծելու հետ, որի համար կարևոր նշանակուոյւն կարող է ունենալ նաև տեղեկատվական հարթակների զարգացումն ու հայֆիկացումը։