ԵՐԵՎԱՆ, 12 մարտի – Sputnik. Այսօր` 2019 թվականի մարտի 12–ին, աշխարհը տոնում է «Համաշխարհային սարդոստայնի» 30-ամյակը։ «Սարդոստայնը» «հյուսել» է բրիտանացի գիտնական Թիմ Բերներս–Լին, որն այդ ժամանակ աշխատում էր եվրոպական ատոմային հետազոտությունների կազմակերպությունում։
Ուղիղ 30 տարի առաջ` 1989 թվականի մարտի 12-ին, Բերներս–Լին ներկայացրեց տեղեկույթի պահպանման և ընդհանուր հասանելիության միասնական համակարգի իր նախագիծը, որն անվանել էր «Համաշխարհային սարդոստայն» (World Wide Web, WWW)։
«Համաշխարհային սարդոստայնը» տեղեկությունների փոխանակման հեղափոխական նորույթ էր այդ ժամանակաշրջանում և տեղեկատվական տեխնոլոգիաների զարգացման համար ծառայեց որպես հզոր խթանիչ։
Այս հայտնագործության շնորհիվ մարդիկ հնարավորություն ստացան շփվելու իրական պահին `հաշվի չառնելով տարածությունը, որովհետև «սարդոստայնը» տեղեկություն ստանալու և տվյալների բազա մուտք գործելու հնարավորություն տվեց մարդկանց։
Google-ն այսօր իր դուդլյան ոճով շնորհավորել է «սարդոստայնի» ծննդյան օրը։ Նկարում շատ լավ երևում է, թե ինչ տեսք է ունեցել «նախացանցը», թե ինչ արագությամբ են բացվել առաջին կայքերը և թե որքան «երևացող» են եղել այդ ժամանակ պիքսելները։
Թիմ Բերներս–Լին նաև առաջին վեբ–կայքի, առաջին վեբ–սերվերի և առաջին հիփերտեքստի նշագրման լեզվի` HTML-ի «ծնողն» է։