ԵՐԵՎԱՆ, 9 մարտի – Sputnik. Ոստիկանությունը բերման է ենթարկել «Դոն Պիպոյին»՝ Արթուր Ասատրյանին։ Այս մասին հայտնում են հայկական լրատվամիջոցները` նշելով, որ նրան բերման են ենթարկել «ասֆալտին փռելու» օպերացիայի շրջանակում։
Sputnik Արմենիան տեղեկությունը ճշտելու նպատակով դիմեց ոստիկանություն և հերթապահ պատասխան ստացավ։
«Ոստիկանությունը թիկնազորի հետ կապված գործողություններ միշտ է իրականացնում»,– պատասխանեցին Sputnik Արմենիային։
Ավելի ուշ մեզ հայտնի դարձավ, որ նրան արդեն ազատ են արձակել։
Հիշեցնենք՝ Արթուր Ասատրյանը ձերբակալվել էր անցած տարվա հունիսի 16-ին` Հայաստան վերադառնալուց որոշ ժամանակ անց։ Հարազատ Էջմիածնում «Դոն Պիպոն» հանրահավաք էր կազմակերպել գեներալ Մանվել Գրիգորյանի և նրա որդու` այն ժամանակ քաղաքապետ Կարեն Գրիգորյանի դեմ։
Ցույցն անցկացվել էր «թավշյա հեղափոխության» խորհրդանիշով, ինչն արժանացել էր ՀՀ վարչապետ Նիկոլ Փաշինյանի խիստ արձագանքին։ Մի քանի օր անց Ասատրյանը կալանավորվել էր։
Ասատրյանին մեղադրանք էր առաջադրվել ՀՀ քրեական օրենսգրքի 131-րդ հոդվածի 1-ին, 2-րդ, 3-րդ և 6-րդ կետերով («Մի խումբ անձանց կողմից նախնական համաձայնությամբ, առողջության համար վտանգավոր բռնություն գործադրելով, զենքի կամ որպես զենք օգտագործվող առարկաների գործադրմամբ, երեք անձի առևանգումը») և 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու համար:
Սեպտեմբերին նա գրավի դիմաց ազատ էր արձակվել։