ԵՐԵՎԱՆ, 7 մարտի — Sputnik, Արմենուհի Մխոյան. ՀՀ-ում Ճապոնիայի արտակարգ և լիազոր դեսպան Ջուն Յամադան այսօր ողջ օրն անցկացրեց Շիրակում։ Նա նախ ներկա գտնվեց Ֆոտովոլտային կայանի բացմանը, հանդիպում ունեցավ Գյումրու քաղաքապետի, հուշագրեր ստորագրեց ընկերությունների հետ, այնուհետև ներկա գտնվեց ճապոնական ֆիլմերի փառատոնին:
«Գյումրին մեզ համար կարևոր քաղաք է: Մինչ այս տարբեր համագործակցություններ ենք փորձել անել, բայց առաջին անգամ է, որ միաժամանակ 3 պայմանագիր ենք ստորագրում»,-նշեց դեսպանը։
Ստորագրված հուշագրերով Ճապոնիայի դեսպանատունն աջակցություն է տրամադրում «Հայկական Կարիտաս» բարեսիրական, «Ապագան մերն է» հասարակական կազմակերպություններին և ՀԱԵ Շիրակի թեմի սոցիալ կրթական կենտրոնին: Տվյալ կազմակերպությունները հիմնականում սոցիալ-կրթական ծրագրեր են իրականացնում, իսկ ճապոնական աջակցությունն ուղղված է տարբեր կառույցների պայմանների բարելավմանը:
Ջուն Յամադան նաև առաջարկեց Գյումրիում ստեղծել սակուրաների պուրակ: «Կարծում եմ` կլիման տարբեր է, բայց կարող ենք ընտրել ճիշտ սորտի ծառեր: Ինչպես ծիրանը Հայաստանի, սակուրան էլ Ճապոնիայի խորհրդանիշն է: Եթե տեղ տրամադրեք, Գյումրիում էլ սակուրա կտնկենք»,-նշեց դեսպանը` փաստելով, որ Հայաստանն ու հատկապես Գյումրին ճապոնացի զբոսաշրջիկներին գրավելու բոլոր նախադրյալներ ունեն: «Կանեմ այնպես, որ ավելի շատ զբոսաշրջիկ գա Գյումրի»,-վստահեցրեց դեսպանը:
Գյումրու քաղաքապետ Սամվել Բալասանյանն էլ նշեց՝ դեմ չէ, եթե ճապոնական բալենիները Հայաստանի հյուսիսի ցրտին դիմանան։ Քաղաքապետն էլ առաջարկեց ոչ միայն սակուրայի այգի, այլ քույր քաղաք ունենալ Ճապոնիայի հետ: «Սինդայը նույն բախտի ու ճակատագրի քաղաք է: Մենք Սինդայի քաղաքապետին արդեն նամակ ենք ուղարկել ու սպասում ենք պատասխանին: Կուզենք, որ Գյումրին ու Սինդայը քույր քաղաքներ դառնան ու համագործակցենք»:
Գյումրու քաղաքապետն ու Ճապոնիայի դեսպանը վստահեցրին, որ համագործակցությունը շարունակական կլինի, իսկ ճապոնական դեսպանատան աջակցությունը ստացող կազմակերպությունները շնորհակալություն հայտնեցին ֆինանսական աջակցության համար, որը կուղղվի տարեցների, մատաղ սերնդի, երիտասարդների և սոցիալապես անապահով ընտանիքների պայմանների բարելավմանը: