ԵՐԵՎԱՆ, 4 մարտի — Sputnik. Իրանի հետ ԵԱՏՄ պարզեցված առևտրի համաձայնագրի վավերացումից հետո ավելի քան 300 ապրանքի Հայաստան ներկրման արժեքները կնվազեն: Այս մասին այսօր ԱԺ-ում լրագրողների հետ զրույցում ասաց տնտեսական զարգացման և ներդրումների նախարար Տիգրան Խաչատրյանը:
«Համաձայնագրի վավերացումից և ուժի մեջ մտնելուց հետո կունենանք Իրանից 300-ից ավելի ապրանքների ներկրման հնարավորություն չնչին մաքսատուրքով»,- ասաց նախարարը:
Իրանի նկատմամբ ԱՄՆ պատժամիջոցները, նախարարի խոսքով, բացասական ազդեցություն կարող է ունենալ հայ-իրանական գործարար հարաբերութունների վրա` որոշակի ոլորտներում: Բայց Տիգրան Խաչատրյանը հուսով է, որ «պատժամիջոցները ժամանակավոր են, համաձայնագիրը` երկարաժամկետ»:
Նախարարը տեղեկացրեց, որ համաձայնագիրն արդեն վավերացրել են ԵԱՏՄ անդամ 5 երկրներից 3-ը` Ռուսաստանը, Բելառուսը և Ղազախստանը: Առաջիկայում կվավերացնի նաև Հայաստանը, ապա` Իրանը:
Այս համաձայնագրով նախատեսվում է այսօր գործող տարբեր չափի մաքսատուրքերի համահարթեցում և նվազեցում: «Մաքսատուրքերը նվազեցվել են, բայց չեն զրոյացվել, դրա համար համաձայնագիրը համարվում է անցումային համաձայնագիր: Ենթադրվում է, որ հաջորդ համաձայնագիրը կլինի արդեն ազատ առևտրի»,- ասաց նախարարը:
Թե ինչ ապրանքների վրա է տարածվելու համաձայնագիրը, նախարարը չհստակեցրեց, միայն նշեց, որ դրանք 300-ից ավելի են: Տիգրան Խաչատրյանը հայտարարեց, որ համաձայնագիրը վառելանյութի, այդ թվում` գազի ներկրման մաքսատուրքի վրա չի տարածվելու: