ԵՐԵՎԱՆ, 2 մարտի — Sputnik. 2018թ. մայիսի 8-ից մինչև 2019թ. փետրվարի 20-ը ՀՀ հատուկ քննչական ծառայությունում հարուցվել ու քննվել է չարաշահումների ու կոռուպցիոն հանցագործությունների մասին 12 քրեական գործ։ ՀՀ հատուկ քննչական ծառայությունը պատասխանել է Sputnik Արմենիայի գրավոր հարցմանն ու ներկայացրել հետհեղափոխական բացահայտումների վիճակագրությունը։
Պատճառված վնասն ավելի քան 20 մլրդ դրամ է հաշվարկվել, ավելի կոնկրետ` 20 695 361 531 ՀՀ դրամ։ Այս ամբողջ գումարից նախաքննության ընթացքում վերականգնվել է միայն է 347 միլիոնը (347 498 872 դրամ)։
Վերականգնված գումարից 33 944 822–ը բացահայտված է եղել հարուցված 5 քրեական գործի շրջանակում, և պատճառված վնասները վերականգնելուց հետո այդ գործերը կարճվել են։
Իսկ մնացած 313 990 050 դրամը վերականգնվել է հարուցված 4 քրեական գործի շրջանակում, բայց այդ գործերը չեն կարճվել, քանի որ գումարն ամբողջությամբ չի վերականգնվել։
Վերոհիշյալ 4 գործերն ու ևս 3 այլ գործեր ՀՔԾ–ն մեղադրական եզրակացությամբ ուղարկել է դատարան։
Դատարան ուղարկված այդ 7 գործերով բացահայտված չարաշահումները կազմում են 20 661 416 709 ՀՀ դրամ։ Այս գումարից ներկա պահին ոչ մի լումա չի վերականգնվել։ Դրա ճակատագիրը կորոշվի արդեն դատաքննության ավարտին, երբ դատական համակարգը կկայացնի վերջնական դատավճիռը։