ԵՐԵՎԱՆ, 27 փետրվարի — Sputnik. Վարչապետ Նիկոլ Փաշինյանը տիկնոջ` Աննա Հակոբյանի և ՀՀ կառավարական պատվիրակության հետ Իրանի Իսլամական Հանրապետության նախագահ Հասան Ռոհանիի հրավերով պաշտոնական այցով ժամանել է Իրան:
Այս մասին տեղեկացնում են ՀՀ կառավարության մամուլի ծառայությունից։
Թեհրանի «Մեհրաբաղ» օդանավակայանից վարչապետ Փաշինյանի գլխավորած պատվիրակությունն ուղևորվել է ԻԻՀ թագավորական «Սաադաբադ» պալատ, որտեղ տեղի է ունեցել դիմավորման պաշտոնական արարողությունը:
Երկու երկրների պաշտոնական օրհներգերը հնչելուց հետո Նիկոլ Փաշինյանը և Հասան Ռոհանին ողջունել են պատվիրակությունների անդամներին, որից հետո մեկնարկել են բարձր մակարդակի բանակցությունները:
Հիշեցնենք, որ Իրանի նախագահ Հասան Ռոհանիի Հայաստան պաշտոնական այցը տեղի է ունեցել 2016թ.–ի դեկտեմբերին։
Իսկ 2018թ.–ի սեպտեմբեր ամսին Նյու Յորքում ՄԱԿ–ի գագաթնաժողովի շրջանակներում հանդիպեցին ՀՀ վարչապետ Նիկոլ Փաշինյանն ու Իրանի նախագահ Հասան Ռոհանին։