ԵՐԵՎԱՆ, 25 փետրվարի – Sputnik. Կարսում Թուրքիայի կողմից անցկացվող զորավարժությունները կարելի է դիտարկել նաև որպես Ռուսաստանի և Հայաստանի վրա ճնշում գործադրելու տարր, Sputnik Արմենիային ասաց ռազմական փորձագետ Դավիթ Հարությունովը։
Փետրվարի 22-ին Թուրքիայի արևելքում` Կարսում, ավարտվեցին «Ձմեռ-2019» միջազգային զորավարժությունները։ 15 երկիր, այդ թվում Ադրբեջանը, Բոսնիան և Հերցեգովինան, Քաթարը, Մեծ Բրիտանիան, Գերմանիան և Իտալիան, 251 զինծառայող են ուղարկել մասնակցելու վերջին տարիներին Թուրքիայում անցկացվող խոշորագույն զորավարժություններին։
«Սրանք խոշոր զորավարժություններ են, որոնց պատրաստվելու համար երկար ժամանակ է պահանջվում, այդ պատճառով չի կարելի ասել, թե այստեղ միայն քաղաքական բովանդակություն կա», – ասել է Հարությունովը։
Թուրքիան ռազմական ոլորտում համագործակցում է մի շարք երկրների հետ, դա նրանց ռազմավարությունն է։ Մյուս կողմից կարելի է խոսել նաև որոշակի աշխարհաքաղաքական համատեքստի առկայության մասին։
«Թուրքիան բարդ առևտուր է անում Ռուսաստանի հետ Սիրիայի, մասնավորապես՝ քրդական հարցի, տարածքների հսկողության վերաբերյալ։ Չի բացառվում, որ այս զորավարժություններով որոշակի ճնշում են ուզում գործադրել Ռուսաստանի վրա։ Բավական է հիշել, որ «ապրիլյան պատերազմը» սկսեց ռուս–թուրքական սուր առճակատման ֆոնին», – նշեց Հարությունովը։
Անկարան Ռուսաստանի վրա ճնշում գործադրելու համար ամեն անգամ որոշակի լարվածություն է ստեղծում Հարավային Կովկասում։ Զորավարժությունները, ըստ Հարությունովի, կարելի է դիտարկել որպես Ռուսաստանի վրա ճնշում գործադրելու միջոց և, հաշվի առնելով արցախյան հակամարտությունը, նաև Հայաստանի վրա։
Ավելի վաղ Հայաստանի պաշտպանության նախարար Դավիթ Տոնոյանը հայտարարել էր, որ հավաքական անվտանգության Կովկասյան տարածաշրջանում Ռուսաստանի ներկայությունը զսպող գործոն է, որը խոչընդոտ է հանդիսանում ռազմական գործողությունների վերսկսման համար։